Jaslar isleri agentligi Qaraqalpaqstan Respublikası basqarması baslıǵı P.Maxsetbayev Tórtkúl rayonına barıp, jaslarǵa baylanıslı mámleketlik siyasat sheńberinde ámelge asırılıp atırǵan jumıslar menen jaqınnan tanıstı. Dáslep, P.Maxsetbayev rayondaǵı mektep direktorları menen ushırasıp, bilimlendiriw shólkemleri hám máhállelerde jaslar menen islesiw nátiyjeliligin jáne de arttırıw máselelerin dodaladı. Sonday-aq, “Balalar háreketi” sárdarlar saylawın nátiyjeli shólkemlestiriw boyınsha oqıw-seminar ótkerildi. Sapar dawamında jaslarǵa jaratılıp atırǵan sharayatlar da úyrenildi. Sonnan: PQ-62-sanlı qarar tiykarında jeńilletilgen kredit alıp, sharwashılıqtı jolǵa qoyǵan Gulhayo Saburova hám milliy kiyimler tigiw cexın shólkemlestirgen Muhayo Kamalovanıń jumısı menen tanıstı. PQ-153-sanlı qarar tiykarında diyqanshılıq ushın jer alıp, dáramatqa kirip atırǵan bir topar jaslardıń qıytaq jeri kózden ótkerildi. PQ-1-sanlı qarardıń orınlanıwı sheńberinde “Shadlıq”, “Uluqbaǵ” hám “Nurlı jol” máhállelerinde jumıs alıp barıp atırǵan jaslar jetekshileriniń jumıs processleri úyrenildi. Bunnan keyin jaslar menen ashıqtan-ashıq sóylesiw shólkemlestirildi. Onda Jaslar isleri basqarması baslıǵı P.Maxsetbayevtıń kóshpeli qabıllawı hám “Aloqa bank”, “Agrobank”, “Xalq banki”, “O’zmilliybank” hám “Mikrokreditbank” wákilleriniń qatnasıwında jaslar ushın jeńilletilgen kredit máselelerine baylanıslı túsinikler berildi. Bul process Prezidenttiń 2025-jıl 14-fevraldaǵı PP-60, PP-61 hám PP-62-sanlı qararlarında belgilengen wazıypalardıń orınlanıwı sheńberinde ótkerildi. Bunnan tısqarı, jámlespegen hám belsendi jaslar menen ushırasıw da shólkemlestirildi. Ushırasıwda “Ibrat farzandlari”, “Mutolaa”, “Qızlar akademiyası”, “Uzchess”, “Ustoz AI” hám “YONIDA” platformalarınıń prezentaciyası hám úgit-násiyatlawı bolıp ótti. Jańa joybarlardı jolǵa qoyıw boyınsha jaslardıń usınıs hám baslamaları dodalandı. Bul sapar dawamında jaslardıń intakerligi, dóretiwshiligi hám olardıń jámiyettegi ornı jáne de bekkemlenip atırǵanı kórindi. Tórtkúl rayonında jaslarǵa baylanıslı mámleketlik siyasat ámelde izbe-iz engizilmekte hám 2025-jılı bul baǵdardaǵı jumıslar jáne de keńeytiletuǵını belgilep alındı.