Usı jıldıń avgust ayında Nókis qalası “Xalıqlar doslıǵı” máhállesindegi “Doslıq” kanalı boyında jańa “Jaslar orayı” imaratı qurıp pitkerildi.
Bul oraydıń qurılısı hám úskeneleniwi Qaraqalpaqstan Respublikası jergilikli byudjeti hám Jaslar isleri agentligi qarjıları esabınan teń úleslerde (50/50) qarjılandırıldı. Joybardıń ulıwma bahası 5 milliard somdı quraydı.
Jańa oray 2 857 kv.m maydanǵa iye bolıp, onıń birinshi qabatında “Book cafe”, “Zakovat” klubı, shashka hám shaxmat dógerekleri, shet tilleri, IT hám robototexnika boyınsha oqıwlar, túrli pánler baǵdarındaǵı jáne inklyuziv kásiplik bilimlendiriw dógerekleri, sonday-aq, kovorking orayı jumıs alıp baradı. Ekinshi qabatta bolsa xızmetkerler ushın xana hám kishi májilisler zalı jaylasqan.

“Jaslar orayı”nıń ashılıwı aldınan Ózbekstan Shaxmat federaciyası Qaraqalpaqstan Respublikası aymaqlıq bóliminiń 2025-jılǵı kalendar rejesine muwapıq 29-30-avgust kúnleri “Nókis jazı” atamasında shaxmat turniri shólkemlestirildi.

Jarıs 7 turdan ibarat bolıp, onda Qaraqalpaqstannıń 10 rayon (qala) ınan 7 jastan 70 jasqa shekemgi 70 shaxmatshı qatnastı. Turnirde balalar, er adamlar hám hayallar arasında kúsh sınastı.
Sonday-aq, oray imaratında “Qaraqalpaqstan Respublikası Joqarǵı Keńesi Baslıǵı kubogi” jarısınıń final basqıshı da ótkerildi. Jeńimpaz hám sıylı orın iyeleri medal, diplom hám bahalı sawǵalar menen sıylıqlandı.
Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, jaslardı qutlıqladı hám jańa oraydıń jumısı olarǵa úlken imkaniyatlar ashıp beretuǵının atap ótti.