Bozatawlı jaslardıń Ferǵana wálayatındaǵı ámeliy saparı dawam etpekte   Bozataw rayonı jaslar delegaciyasınıń Ferǵana wálayatına ámeliy saparı qızǵın hám tásirlerge bay túrde ótpekte. Sapardıń dáslepki mánzilinde wákiller “Baǵban” máhállesinde bolıp, ol jerde jaslar tárepinen gidroponika usılında qulpınay jetistiriw joybarı menen tanıstı. Zamanagóy agrotexnologiyalarǵa tiykarlanǵan bul baslama jaslardıń isbilermenlik kónlikpelerin arttırıw hám jańa jumıs orınların jaratıwda áhmiyetli orın iyeleydi.

Delegaciya aǵzaları, sonday-aq, Quvasay qalasındaǵı Jaslar sanaat zonasında bolıp, aymaqta jaratılǵan imkaniyatlar hám óndiris processleri menen jaqınnan tanıstı. Bunnan keyin ámeliy sóylesiwler Ferǵana qalasında dawam etti. Bul jerde zamanlaslarınıń “Jaslar dápteri” járdeminde jolǵa qoyılǵan biznes joybarları hám jergilikli sanaat zonasındaǵı jumısı úyrenildi.

Sapar baǵdarlamasınıń gezektegi mánzili Marǵilan qalasında dawam etti. Miymanlar “Taslaq tóbe” máhállesinde jumıs alıp barıp atırǵan jas isbilermen Murodil Banopovtıń jumıs procesi menen tanıstı. Eki jıldan berli óz biznesin tabıslı júrgizip kiyatırǵan isbilermen búgingi kúnde 15-20 zamanlasın turaqlı jumıs penen támiyinlegen. Kárxanada jumısshılardıń kúnlik dáramatı 500-600 mıń sumdı, isbilermenniń aylıq sap dáramatı bolsa 15-20 million sumdı quramaqta.

Sonday-aq, bozatawlı jaslar Marǵilan qalasındaǵı Jaslar kishi sanaat zonası hám bir qatar isbilermenlik subektlerinde bolıp, óndiris kólemi hám jaratılǵan sharayatlardı kózden ótkerdi.Basqa aymaqlardaǵı tabıslı ámeliyatlardı úyreniw hám óz-ara tájiriybe almasıwǵa qaratılǵan bul sapar jaslarǵa óz biznes ideyaların ámelge asırıwda bay kónlikpe hám motivaciya bermekte.