«Xalıqaralıq qızlar kúni» – 2012-jıl 11-oktyabr kúni Birlesken Milletler Shólkeminiń Bas assambleyasında tiykar salınǵan bolıp, bul sáne hár jılı qızlardıń kemsitiliwi, olardıń sociallıq mashqalalarına pútkil dunyanıń itibarın qaratıw maqsetinde belgilenedi.

Álbette, jurtımızda da qızlarǵa bolǵan itibar, olardı hár tárepleme qollap-quwatlaw máselesi joqarı dárejede.

Olardıń salamatlıǵın jaqsılıw, bilim alıwına shárt sharayatlar jaratıw, sociallıq mashqalaların unamlı sheshiwge kómeklesiwge itibar keyingi jıllarda jáne de joqarı dárejege kóterildi.

Sáne múnásibeti menen Moynaq rayonı Máhálle hám shańaraqtı qollap-quwatlaw bólimi tárepinen 2-sanlı Balalar muzıka hám kórkem-óner mektebinde “qızlar forumı” shólkemlestirildi.

Forumdı ótkeriwden maqset – mámleketimizde qızlardı hár tárepleme qollap-quwatlaw, bilim alıw hám kásip-óner úyreniw imkaniyatların keńeyttiriw, bántligin támiyinlew hám sociallıq belsendiligin asırıw boyınsha ámelge asırılıp atırǵan jumıslardı keń járiyalaw, joqarı mánáwiy jetiskenlik hám milliy qádiriyatlarǵa hámde ana Watanǵa sadıq etip tárbiyalawdan ibarat.

Ilaj miymanları 2-sanlı Balalar muzıka hám kórkem-óner mektebi menen birge, Bárkamal áwlad, mektepke shekemgi bilimlendiriw shólkemleri tárepinen islengen hárqıylı qol óner buyımlarınan ibarat kórgizbelerdi tamashaladı.

Sonıń menen birge, koncert baǵdarlaması usınıldı. Forumda “Biybixanım mektebi”, “Qızlarjan” klubi aǵzaları da belsendilik kórsetti.

Joqarı keypiyatta bolıp ótken forum sońında pán olimpiadalarında jaqsı nátiyjelerge erisken, jámiyetlik jumıslarǵa belsene qatnasqan oqıwshı qızlarga rayon hákimi tárepinen tayarlanǵan húrmet jarlıǵı hám bahalı sıylıqlar tapsırıldı.

Moynaq rayonı hákimligi Málimleme xızmeti