️”El-yurt umidi” qorı kúnleri” sheńberinde Nókis qalasında ushırasıw ótkerildi Búgin Nókis qalası Jaslar orayında “El-yurt umidi” qorı kúnleri” sheńberinde gezektegi ilaj bolıp ótti. Ilajda aymaqtaǵı 11-klass oqıwshıları, joqarı bilimlendiriw mákemeleriniń studentleri, olardıń ata-anaları, máhálle jasları, jas mámleketlik xızmetkerler hám “El-yurt umidi” qorınıń stipendiantları qatnastı. Ushırasıwda Ózbekstan Respublikası Prezidenti janındaǵı “El-yurt umidi” qorınıń atqarıwshı direktorı Gulnoza Ismailova, Jámiyetshilik penen baylanıslar hám málimleme xızmetiniń basshısı Elvina Mustafina, Maqsetli stajirovkalardı muwapıqlastırıw basqarmasınıń baslıǵı Ǵolibjon Xatamov, bas inspektor Murod Fayziev, Sanlastırıw hám málimleme-tallaw basqarmasınıń bas inspektorı Qaxramon Bektemirov, Qábiletli jaslar hám qánigeler menen islesiw basqarmasınıń bas inspektorı Mumina Istamova hám inspektor Rita Aytmuratova qatnastı. Ilaj dawamında qor wákilleri tárepinen “El-yurt umidi” qorınıń jumısı, Ózbekstan Respublikası Prezidentiniń qábiletli qánigelerdiń sırt elde bilim alıwın qollap-quwatlawǵa baylanıslı pármanınıń mazmun-mánisi, ashıq stipendiya tańlawlarınıń tártibi hám talabanlarǵa qoyılatuǵın talaplar haqqında tolıq maǵlıwmat berildi. Sonday-aq, sırt elde bilim alıp qaytqan stipendiatlar tárepinen jaslar menen motivaciyalıq ushırasıw hám sheberlik sabaqları ótkerildi. Olar óz tájiriybeleri menen ortaqlasıp, jaslarǵa sırt elde bilim alıw, kásiplik kónlikpelerdi rawajlandırıw hám Watanǵa qaytıp xızmet etiw boyınsha usınıslar berdi. Ilaj qatnasıwshıları “El-yurt umidi” qorınıń jumısı, bilimlendiriw hám karyera imkaniyatları, sonday-aq, Ózbekstanda qábiletli jaslardı qollap-quwatlawdıń jańa basqıshları haqqında keńirek túsinikke iye boldı.