Usı jıldıń 2-aprel kúni Berdaq atındaǵı qaraqalpaq ádebiyatı tariyxı mámleketlik muzeyinde Ózbekstan Jazıwshılar awqamı tárepinen ótkerilgen «Zámin-2021» Jas dóretiwshiler seminari qatnasıwshısı, «Jas dóretiwshiler» klubı aǵzası Meyrambek Ábdiqáliev avtorlıǵında baspadan shıqqan «Qızılqum» atamasındaǵı tunǵısh qosıqlar toplamınıń tanıstırıw keshesi bolıp ótti.

Ilajǵa QMUdıń qazaq tili hám ádebiyatı kafedrası oqıtıwshısı G.Adilova, NMPIdiń qazaq tili hám ádebiyatı kafedrası oqıtıwshıları T. Tórtkúlbaeva hám G. Mámbetkárimovlar menen birgelikte student jaslar hám klub aǵzaları qatnastı.

Sózge shıqqanlar Meyrambek Ábdiqáliev haqqında ózleriniń bahalı pikirlerin aytıp, onıń qosıqlarında lirika joqarı dárejede sáwlelenetuǵının ayrıqsha atap ótti.

Maǵlıwmat ushın, M.Ábdiqáliev 1992-jıldıń 9-may kúni Taxtakópir rayonında dúnyaǵa kelgen. Ol Ózbekstan Respublikası kóleminde ótkerilgen bir neshe tańlawlardıń, sonday-aq, Qazaqstan Respublikası ǵárezsizliginiń 30 jıllıǵı múnásibeti menen shólkemlestirilgen «Táwelsizdikke taǵzım» qosıq músháyrasında S.Jiyenbaev atındaǵı sıylıqtıń laureatı bolǵan.

Sonday-aq, onıń birqatar qosıqları namaǵa salınǵan bolıp, házirgi kúnde bul qosıqlar jaslar tárepinen súyip tıńlanadı.

Bekbergen Adilbaev, «Jas dóretiwshiler» klubı aǵzası