Nókiste Qaraqalpaqstannıń eń jaqsı startapları ushın ótkerilgen tańlawdıń final basqıshı bolıp ótti

Jaqında, Nókis qalasındaǵı Jaslar orayında Qaraqalpaqstannıń eń jaqsı startap ideyalar tańlawınıń juwmaqlawshı basqıshı bolıp ótti.  

Usı jıldıń yanvar-mart ayları dawamında BMSh Rawajlanıw baǵdarlaması kómeginde Ózbekstan jaslar isleri agentligi Qaraqalpaqstan Respublikası basqarması menen birgelikte Qaraqalpaqstan Respublikası innovacion rawajlanıw ministrligi aymaqlıq basqarması menen sheriklikte qala-rayonlardan 18-30 jasqa shekemgi bolǵan jaslar ushın isbilermenlik tiykarları hám startap baslamaların baslaw basqıshları boyınsha oqıw kursı shólkemlestirildi.  

Kurs dawamında 72 qatnasıwshı informaciyalıq texnologiyalar, ekonomika, sociallıq baslamalar, turizm, aymaqlıq ekologiya ózgerisleri, bilimlendiriw sıyaqlı tarawlarda innovacion ideyalar hám startap ideyaların ámelge asırıw tiykarların úyrenip, maqsetli auditoriyanı tańlawdı úyrendi. Oqıw processi dawamında qatnasıwshılar tájiriybeli ustazlardan jańa informaciyalar alıw imkaniyatına iye boldı, olar joybardıń kemshiliklerin kórsetip, tańlawda inám etiw ushın jetilistiriw jolların usınıs etti.    

Kurs baǵdarlaması, sonday-aq, tájiriybeli isbilermenler qatnasıwında mazmunlı onlayn ushırasıwlar, sheberlik sabaqları, biznes-rejeler dúziw hám start-uplardı ámelge asırıw máseleleri boyınsha arnawlı ekspert-mentorlar hám biznes iyelerinen másláhát aldı.            

Aralboyı awıl xalqınıń jasaw tárizin jaqsılawǵa qaratılǵan innovacion startaplar boyınsha tańlawdıń juwmaqlawshı basqıshında 16 komanda óziniń joybarları menen qatnastı.    

Bular:

“Bookie” qaraqalpaq tilindegi audiokitaplar, Kombinat programmistov, M-Bazar, “Bilim”, “Sawbol”, Eko-sumka “Qaraqalpaqstan”, “Eco garden house”, “Fashion-krujka”, “PET”, “Asu-briket” hám basqalar…    

Tańlaw jeńimpazları BMShınıń Ózbekstandaǵı Aralboyı aymaǵı ushın insan qáwipsizligi boyınsha Kópsheriklik trast fondı tárepinen qarjılandırılǵan BMShTD, YUNFPA, FAO “Aralboyı aymaǵınıń jaqsı qorshalmaǵan birge islesiwshi jámiyetlerdegi ekonomikalıq hám azıq-awqat qáwipsizligi mashqalaların sheshiw ushın jaslar hám tómen xalıqtıń maslasıwı arqalı dóretiwshilik hám innovacion imkaniyatların rawajlandırıw” atlı baǵdarlamasın ámelge asırıw sheńberinde finanslıq yamasa texnikalıq kómek aladı.  

Tańlawdıń ekpertleri tárepinen tańlap alınǵan joybarlar: “Bookie” qaraqalpaq tilindegi audiokitaplar, Kombinat programmistov, “Bilim”, “Sawbol”, Eko-sumka “Qaraqalpaqstan”, Suw texnologiyasın jetilistiriw hám basqa da iri joybarlar 2000 hám 3000$ lıq pul utısların qolǵa kirgizdi.

Bunnan tısqarı 3 ay dawamında onlayn sabaqlarda belsendi qatnasqan jaslar shólkemlestiriwshiler tárepinen arnawlı sertifikatlar menen sıylıqlandı.