Búgin, 10-sentyabr kúni Qaraqalpaqstan Respublikası Jaslar isleri basqarması hám “Jaslar – keleshegimiz” qorınıń aymaqlıq filialı menen birgelikte jaslardıń bántligin támiyinlew baǵdarındaǵı ámeliy háreketlerdi keń jámietshilikke jetkeriw maqsetinde ǵalaba xabar quralları, jurnalistler hám blogerler ushın press-tur ótkerildi. Dáslep qatnasıwshılar Nókis qalasındaǵı aralas hám paxta talshıqlarınan iyirilgen jip islep shıǵarıwǵa mólsherlengen jańa fabrikanıń jumısı menen jaqınnan tanıstı. Ulıwma bahası 49 million dollar bolǵan bul joybar esabınan 400 jańa jumıs ornı jaratılıp, jaslar ushın turaqlı dáramat dáregi qáliplestirildi. Kárxana jılına 18 mıń tonna ónim islep shıǵarıw hám 9 million dollarlıq ónimdi eksport etiwdi rejelestirgen. Turdıń keyingi mánzili turaq jaylardı ısıtıwǵa mólsherlengen zamanagóy radiatorlar islep shıǵarıwshı kárxana boldı. 23,5 million dollarlıq bul joybar sheńberinde 300 jańa jumıs ornı ashılıp, zamanagóy texnologiyalar engizilgen. Press-tur dawamında jurnalist hám blogerler kárxanalardıń óndiris processleri, jaratılǵan jumıs orınları, miynet sharayatları hám jaslar ushın jaratılıp atırǵan imkaniyatlar menen jaqınnan tanıstı. Sonday-aq, qánigeler menen sáwbetlesip, kárxanalardıń keleshektegi rawajlanıw rejeleri haqqında maǵlıwmat aldı. Aymaqta jańa investiciyalıq joybarlardı keńnen úgit-násiyatlaw, jaslardı zamanagóy hám turaqlı jumıs orınlarına tartıw jáne olardıń kásiplik kónlikpelerin rawajlandırıwdan ibarat. Bunday háreketler jaslardıń keleshegi ushın bekkem tiykar bolıp xızmet etpekte.