Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis qalasındaǵı 24-sanlı ulıwma bilim beriw mektebinde ótkerilgen sońǵı qońıraw ilajında qatnastı.

Ilajda Joqarǵı Keńes Baslıǵı Prezidentimizdiń mektep pitkeriwshilerine jollaǵan qutlıqlawın oqıp esittirdi.

Sonday-aq, jaslarǵa atalarsha ǵamxorlıq kórsetip kiyatırǵan húrmetli Prezidentimizge, oqıwshılardı kamalǵa keltirip, tárbiyalaǵan ata-analarına, olarǵa bilim bergen muǵallimlerge minnetdarshılıq bildirdi.

Aytıp ótiw orınlı, usı jılı pútkil elimiz boylap “Sońǵı qońıraw” ilajları kóterińki ruwxta ótkerilmekte. Usınday quwanıshlı kúnde respublikamızdaǵı 721 mektepte “Sońǵı qońıraw” shertilip, olardaǵı 26 mıńnan aslam oqıwshı-jaslarımız qádirli ana mektepleri menen xoshlaspaqta.

Álbette, bul pitkeriwshi jaslar arasınan elimizdiń dańqın dúnyaǵa tanıtatuǵın, ana-Watanımızǵa tabıslı xızmet etip, elimizdiń rawajlanıwına múnásip úles qosatuǵın jaslar jetilisip shıǵadı. Búgingi ilaj dawamında sońǵı qońıraw qaǵıldı.