Ushırasıwda Jaslar isleri agentligi Qaraqalpaqstan Respublikası basqarmasınıń baslıǵı Polat Maqsetbayev, Ámiwdárya rayonı hákimi Sabır Xojametov, respublika hám rayon kólemindegi túrli taraw basshıları, shólkem hám mákemelerdiń wákilleri, jaslar qatnastı.

Ilaj dawamında jaslarǵa bilimlendiriw, bántlik, isbilermenlik, kásip-óner úyreniw, grant hám jeńilletilgen kreditler, startap joybarlar, sırt elde bilim alıw hám jumıs penen támiyinlew sıyaqlı baǵdarlarda mámleket tárepinen jaratılıp atırǵan keń imkaniyatlar haqqında tolıq maǵlıwmatlar berildi. Qánigeler jaslardı qollap-quwatlawǵa qaratılǵan ámeldegi baǵdarlama hám baslamalardı túsindirip, olardan nátiyjeli paydalanıw boyınsha usınıslar berdi.

Eń áhmiyetlisi, ushırasıw ashıq sóylesiw ruwxında ótti. Jaslar ózlerin qıynap atırǵan mashqalalar, bar kemshilikler hám jańa usınıslar boyınsha basshılarǵa tikkeley múrájat etiw imkaniyatına iye boldı. Bildirilgen máselelerdiń kópshiligi ornında kórip shıǵılıp, tiyisli juwapkerlerge anıq tapsırmalar berildi.

Bul ushırasıw jaslardıń baslama hám ideyaların qollap-quwatlaw, olardı jámiyetlik turmısta jáne de belsene qatnasıwǵa iytermelew jáne mámleket hám jaslar arasındaǵı ashıq pikirlesiwdi bekkemlewge xızmet etti.