Húrmetli Prezidentimizdiń Qaraqalpaqstan Respublikasına, ásirese jaslarǵa itibarı, mehri bólek. Bunı keshe ǵana Prezidentimizdiń Respublikamızǵa qılǵan saparı dawamında jaslarımız ushın berilgen imkaniyatlardan kóriwimizge boladı. Atap aytqanda, jaslar bántligin támiyinlew, isbilermenligin qollap-quwatlaw baǵdarında Jaslardı qollap-quwatlaw fondı arqalı Qaraqalpaqstandaǵı jas ibilermenlerge 7 jılǵa shekemgi múddetke jeńillikli shártlerde supsidalar ajıratıw, jıl aqırına shekem bántlikke kómeklesiw fondı esabınan Koson rayonı tájiriybesi tiykarında Qońırat, Nókis hám Shımbay rayonlarında «Jumısqa márhamat» mono orayların qurıw boyınsha bergen tapsırmaları búgingi kúndegi en áhmiyetli mashqalalardıń biri jaslar bántligin támiyinlewde áhmiyetli ról oynaydı.

Sonday-aq bos turǵan mámleketlik obiektlerde jaslar hám hayal-qızlardı shet tiller hám IT kurslarına oqıtıw kursların shólkemlestiriw imkaniyatınıń jaratılıwı hám bul obiektler isbilermenlerge 5 jıl múddetke shekem biypul paydalanıwǵa beriliwi jaslarımızdıń usı tarawlarda jetik qánige bolıp shıǵıwları ushın shárayat jaratadı.

Qaraqalpaqstan Respublikasında jaslardı joqarı bilimlendiriwge qamtıw dárejesi 30-31 procentti quramaqta. Bul bolsa biziń bul baǵdarda ele de qılınatuǵın islerimizdiń kóp ekenliginen dárek beredi. Al, Prezidentimizdiń Qaraqalpaqstanlı jaslar ushın Ózbekstan Respublikasındaǵı barlıq joqarı oqıw orınlarınan óz aldına qabıllaw kvotalarınıń ajıratılıwı bolsa, Qaraqalpaqstanda joqarı maǵlıwmatlı hám búgingi kúndegi zárúr bolǵan kadrlardıń kóbeyiwine sebep boladı.

Álbette jaslar bul imkaniyatlardan paydalanıw, oqıp izleniwi hám ózleriniń aydın keleshegin jaratıwı kerek. Prezidentimizdiń isenimin aqlaw ushın jaratıp bergen shárayatlardan múnásip paydalanıwdıń ózi jetkilikli boladı dep oylayman.

Usı orında barlıq watanlaslarımızdı, pútkil qaraqalpaq jasların Ǵárezsizligimizdiń 31 jıllıq bayramı menen qutlıqlayman. Tınıshlıǵımzǵa kóz tiymesin!

Polat Maxsetbaev,

Jaslar isleri agentligi Qaraqalpaqstan Respublikası basqarması baslıǵı