23-may kúni Shımbay rayonı hákimligi baslaması menen “Tazajol” awıl puqaralar jıyını aymaǵında jaylasqan 12-sanlı ulıwma bilim beriw mektebinde úlken ilaj ámelge asırıldı.
Tiykarınan, “Bozataw” awılında Xalıq bántligine kómeklesiw orayı tárepinen bos jumıs orınları miynet yarmarkası, medicina orayı tárepinen biypul medicinalıq kórikten ótkeriw, sociallıq járdemge mútáj shańaraqlar ushın azıq-awqat ónimleri tarqatılǵan bolsa, awıl xalqınıń jası úlken nuraniyleri ushın úlken qazanda taǵamlar tayarlandı hám awıl xalqınıń jolın jaqın qılıw maqsetinde úlken asfalt jollar boylap ońlaw jumısları ámelge asırıldı.

Maǵlıwmat ornında aytıp ótiw kerek, házirde 12-sanlı mektepte jámi 86 oqıwshı tálim almaqta, rayon orayınan 40 km uzaqlıqta jaylasqan bul mektepti usı jılı 15 oqıwshı pitkeredi, bul jaslarǵa rayon hákiminiń arnawlı sawǵaları hakim orınbasarları tárepinen tapsırıldı, jánede mektep kitapxanası ushın ádebiy kitaplar toplamı sawǵa etildi
Sonıda aytıp ótiw kerek, usı kúni Shımbay rayonı “Taza jol” awıl puqaralar jıyını aymaǵinda jaylasqan “Bozataw” awılınıń 12-sanlı mektep jasları ushın “Kamalak” balalalar shólkeminiń náwbettegi XXI Ánjumani ótkerildi.
Balalardıń teń huqıqlılıǵın támiyinlew, olardıń milleti hám dinine, rasasına qaramastan ózine aǵza qılǵan, balalıq arzıwların júzege shıǵarıwda qol-qanat bolǵan balalar shólkemi 21 jasqa tolmaqta.
Usı múnasibet penen Jaslar isleri agentligi Shımbay rayonlıq bólimi, Jaslar awqamı jergilikli Keńesi hám Sárdarlar Keńesi aǵzaları baslaması menen rayon orayınan 40 km uzaqlıqta jaylasqan 12-sanlı mekteptiń shólkem aǵzaları ushın XXI Ánjumanı shólkemlestirildi. Ánjuman sheńberinde:
– milliy oyınlar;
– seminar treningler;
– sport jarısları;
– fleshmob;
– házil maydanı joybarları ámelge asırıldı
Sonday-aq, mekteptiń eń belsendi sárdarları arnawlı diplom hám estelik sawǵaları menen sıylıqlandı. Ilaj sońında rayonlıq Mádeniyat bólimi tárepinen koncert baǵdarlaması shólkemlestirildi.