«Jas watanlaslar reestri» elektron sisteması iske túsiriledi
«Mámleketlik uyımlar hám shólkemlerde miynet etip atırǵan jas qánigeler hám jas watanlaslarǵa zárúr shárayatlar jaratıw is-ilajları haqqında»ǵı Húkimet qararı (101-san, 07.03.2022-j.) qabıl etildi. Bul haqqında «Aniq.uz» basılımı xabar berdi.
Qararǵa muwapıq, 2022-jıl iyun ayınan baslap shet eldegi abıroylı JOOlarda oqıp atırǵan, jetekshi kompaniyalarda islep atırǵan Ózbekstan jaslarına (jas watanlaslar) ministrlikler, keńseler hám shólkemlerde islewi ushın sharayat jaratıw maqsetinde:
● jas watanlaslar jumısı dawamında xızmet turaq-jayları menen támiyinlenedi;
● mámleketlik uyımlar hám shólkemlerde keminde 2 jıl islegen jas watanlaslarǵa turaq-jay ushın ipoteka kreditiniń dáslepki vznosı hám procentlerdiń bir bólegin qaplawǵa subsidiya beriledi.
2022-jıl 1-iyunǵa shekem «Jas watanlaslar reestri» elektron sisteması iske túsirilip, usı sistema shet eldegi watanlas ilimpazlar, ekspertler hám izertlewshiler ashıq dizimnen ótiwshi platformaǵa integraciya etiledi.
Hár jılı 1-martqa shekem mámleketlik uyımlar hám shólkemler sistemasındaǵı maman jas qánigeler hám jas watanlaslardı aldaǵı waqıtlarda joqarı lawazımǵa belgilew boyınsha tiykarlanǵan usınıslardı Jaslar isleri agentligine beredi.
Agentlik 1-aprelge shekem usınıslardı úyrenip Prezident Adminstraciyasına usınıs kirgizedi.