Ministrler Kabinetiniń 2021-jıl 11-mart kúnindegi 132-sanlı «Jaslardı sociallıq qollap-quwatlaw boyınsha qosımsha is-ilajlar haqqında»ǵı qararına muwapıq, mámleketimizdegi professional hám joqarı oqıw orınlarında bilim alıp atırǵan «Temir dápter»ge kirgizilgen shańaraqlar perzentleriniń, sonday-aq, «Jaslar dápteri»ne kirgizilgen jaslardıń tólemli kontrakt summasınıń 50 procentine shekem, biraq BEMniń 50 esesinen kóp bolmaǵan muǵdarda tólep beriliwi belgilengen (https://t.me/YQQUZB_KANAL/9181).

Bazalıq esaplaw muǵdarı – 270 mıń swm (2021-jıl, 1-sentyabrden). 50 × BEM = 13 500 000. Demek, 13 500 000 swmnan kóp bolmaǵan muǵdarda pul tólep beriledi.

Eger siziń shańaraǵıńız «Temir dápter»ge yamasa ózińiz «Jaslar dápteri»ne kirgizilgen bolsańız, bul jeńillikten paydalanasız.

«Temir dápter»ge Ministrler Kabineti tárepinen belgilengen tártipke muwapıq tómendegi shańaraqlar kirgiziledi:

• sociallıq járdemge mútáj I hám II topar mayıplıǵı bolǵan aǵzaları bar shańaraqlar;

• kem támiyinlengen jalǵızlar hám kekseler;

• baǵıwshısın joǵaltqan mútáj shańaraqlar;

• kóp (4 hám onnan artıq) perzentli materiallıq járdemge mútáj shańaraqlar;

• miynetke jaramlı jumıssız aǵzaları bar shańaraqlar;

• medicinalıq járdemge mútáj shańaraqlar (sozılmalı yamasa awır mayıplıqqa alıp keliwshi kesellikke shatılǵan hám mayıplıq toparı belgilenbegen aǵzaları bar jeterli dáramat deregine iye bolmaǵan shańaraqlar);

• turaq emes jaylarda jasap atırǵan, ózi yamasa birgelikte jasawshı shańaraq aǵzalarınıń atında turaq jay bolmaǵan mútáj shańaraqlar.