Qaraqalpaqstan Respublikası Jaslar isleri basqarması tárepinen “Jaslar siyasatında ámelge asırılǵan ilajlar hám aldaǵı rejeler” atamasında baspasóz konferenciyası ótkerildi.

Baspasóz konferenciyasında respublikalıq hám jergilikli ǵalaba xabar qurallarınıń wákilleri, jurnalist hám blogerler qatnastı. Ilaj aldınan qatnasıwshılar kún tártibi menen tanıstırıldı hám baspasóz konferenciyasınıń tiykarǵı maqset hám wazıypaları belgilep alındı. Qaraqalpaqstan Respublikasında jaslarǵa baylanıslı mámleketlik siyasat sheńberinde 2025-jıl dawamında sistemalı jumıslar ámelge asırılıp, bir qatar unamlı nátiyjelerge erisildi. Ilajda Qaraqalpaqstan Respublikasında jaslar siyasatında 2025-jıl dawamında ámelge asırılǵan ilajlar, jańa baslamalar hám keleshekte ámelge asırılıwı rejelestirilgen ámeliy jumıslar haqqında tolıq maǵlıwmatlar berildi.

Bayanatlar dawamında videomateriallar kórsetilip, taraw boyınsha statistikalıq maǵlıwmatlar ashıq hám túsinikli tárizde usınıldı.

2026-jıldıń 24-fevral kúni Prezident Shavkat Mirziyoyevtiń jaslardıń baslamaların qollap-quwatlaw boyınsha qosımsha imkaniyatlarǵa baǵıshlanǵan ushırasıwı ótkerilgen edi. Bul ushırasıwda alǵa qoyılǵan baslamalar baspasóz konferenciyasında keńnen dodalandı hám videomateriallar kórsetildi.

Baspasóz konferenciyasınıń juwmaqlawshı bóliminde ǴXQ wákilleri, jurnalist hám blogerler tárepinen berilgen sorawlarǵa Agentlik qánigeleri tárepinen tolıq hám tiykarlanǵan juwaplar berildi. Soraw-juwaplar procesinde jaslar siyasatına baylanıslı áhmiyetli máseleler boyınsha ashıq pikirlesiw alıp barıldı.