Qaraqalpaqstan shaxmatınıń pidayı wákili, kóp jıllıq tájiriybege iye trener, sport ustası hám sheber shaxmatshı ustaz Quralbay Djakashov usı jıldıń 27-yanvar kúni 65 jasında dúnyadan ótti. Bul tek onıń shańaraǵı hám jaqınları ushın emes, al pútkil shaxmat jámiyetshiligi ushın úlken joǵaltıw boldı.

1959-jılı 3-noyabrde tuwılǵan Quralbay Djakashov óz ómirin shaxmattı rawajlandırıw hám jas áwladtı tárbiyalawǵa baǵıshladı. Ol 2020-2024-jılları Qaraqalpaqstan shaxmat federaciyasınıń atqarıwshı direktorı lawazımında jumıs islegen dáwirinde shaxmattıń rawajlanıwına úlken úles qostı. Onıń basshılıǵında kóplegen joybarlar ámelge asırılıp, jańa talantlar júzege shıqtı hám shaxmattıń jaslar arasında ǵalabalıq túrde en jaydırılıwına erisildi.

Sheber shaxmat ustası Ózbekstan saylandı komandası quramında para shaxmat boyınsha joqarı shıńlardı basıp ótip, xalıqaralıq maydanlarda elimizdiń bayraǵın bálent kóterdi hám bul arqalı mámleketimizdiń dańqın joqarılatıwǵa óz úlesin qostı. Onıń xalıqaralıq turnirlerdegi jetiskenlikleri kópshilik ushın ilham dáregi bolıp xızmet etedi.

Ustazımız óziniń miynetkeshligi, sabır-taqatı hám insanıylıq pazıyletleri menen kópke órnek boldı. Ol shaxmattı ómir menen birlestirip, jaslarǵa logikalıq pikirlew, sabırlılıq hám jigerli bolıw sabaqların berip bardı.

Búgin biz úlken tulǵanı joǵalttıq, biraq onıń qaldırǵan miyrası, aqıl-násiyatları hám shaxmatqa bolǵan muhabbatı bárqulla kewillerimizde jasaydı. Ustazımızdıń adamgershilik pazıyleti hám pidayı xızmetleri heshqashan umıtılmaydı. Onıń jarqın esteligi áwladlar qálbinde máńgi saqlanıp qaladı.

Jaslar isleri agentligi Qaraqalpaqstan Respublikası basqarması, shaxmat federaciyası jámááti marhumnıń jaqınlarına tereń qayǵırıw menen kewil bildiredi.