Búgin, 13-may kúni «Bozataw FEST — Jaslar hawazı» tańlawınıń estrada baǵdarı boyınsha bellesiwler Nókis qalasındaǵı sport mektebi imaratında shólkemlestirilgen arnawlı pavilonda bolıp ótti.

Bunda 3 jas kategoriyası (10-15 jas, 16-22 jas, 23-30 jas) boyınsha 41 jas óz talantların sınnan ótkerdi. Tóreshiler quramı tárepinen qatnasıwshılardıń sheberligi, shıǵıwı hám dawıs imkaniyatları ustav talapları tiykarında bahalap barıldı.

Quwanıshlı tárepi, tańlawdıń estrada baǵdarı boyınsha 10-15 jas kategoriyasında qatnasqan Ásemay Urakova, 16-22 jas kategoriyasında qatnasqan Orazbiyke Jiyenbaeva hám 23-30 jas kategoriyasında qatnasqan Timur Nuratdinov SUPER FINAL jollamasın qolǵa kirgizdi.

Demek, jeńimpazlardıń nátiyjesi 16-may kúni Bozataw rayonında ótkeriletuǵın sıylıqlaw saltanatında járiyalanadı.