Húrmetli Prezidentimizdiń 2022-jıl, 25-fevral kúngi Qaraqalpaqstan Respublikasına bolǵan saparı dawamında Bozataw FEST — Jaslar hawazı festivalın shólkemlestiriw, sonday-aq, tańlawdıń final basqıshın Qaraqalpaqstan Respublikasında ótkeriw belgilengen edi.

Usıǵan muwapıq, búgin, 9-may kúni tańda tańlawdıń Tashkent qalası hám wálayat basqıshında jeńimpaz bolǵan qatnasıwshılar respublikalıq final basqıshında qatnasıw ushın Nókis qalasına jetip keldi.

Qatnasıwshılardı kútip alıw saltanatında Qaraqalpaqstan Respublikası Ministrler Keńesi Baslıǵınıń orınbasarı Bayrambay Ótemuratov sózge shıǵıp, jaslarǵa jaratılıp atırǵan imkaniyatlardı maqtanısh penen tilge aldı hám qatnasıwshılarǵa áwmet tiledi.

Bunnan soń ilaj mádeniyat tarawı wákilleri tárepinen milliy úrp-ádetlerge say túrde tayarlanǵan koncert baǵdarlaması menen dawam etti.

Esletip ótemiz, Bozataw FEST festivalı usı jıldıń 10-16-may kúnleri bolıp ótiwi jobalastırılmaqta. Onda jámi 152 jas 4 baǵdar — baqsıshılıq, dástúriy atqarıwshılıq, opera hám estrada baǵdarı boyınsha talantların sınnan ótkeredi.