?Máhálle xabarları?
— 14-iyun kúni Shımbay rayonı Mayjap awıl puqaralar jıyını aymaǵinda jaylasqan “Qoshqar jıqqın” awılında jaslar jetekshisi Nizamatdin Mámbetalievtiń baslaması menen “Jaslar aylıǵı” sheńberinde Mádeniyat bólimi hám Kitapxana-resurs orayı tárepinen konsert baǵdarlaması shólkemlestirildi. Sonday-aq, “Ózgelerden ózgeshe” komandası ózińiń házilleri menen, Mádeniyat xızmetkerleri intermediya hám qosıqları menen awıl xalqınıń kewil keypiyatın kóterdi. Konsert baǵdarlamasın shólkemlestiriwde 26-sanlı mektep jámááti jaqınnan járdem berdi.
— 15-iyun kún Keńes awıl puxaralar jıyınında «1 nuraniyge 10 jas» joybarı tiykarında ushırasıw ótkerildi. Ushırasıwǵa máhálleniń eń húrmetli nuraniyleriniń biri Habib Esemuratov qatnasıp, ózine biriktirilgen jaslar menen sáwbetlesiw ótkerdi. Olarǵa óziniń ómir jolı haqqında, sonıń menen birge elimizdiń tariyxtaǵı qaharmanları haqqında aytıp berip, jaslardıń júreginde úlken tásir qaldırdı.
16-iyun kúni Keńes máhállesi jaslar jetekshisi baslaması menen «Bilim ring» intellektual oyını ótkerildi. Bilim ringe jámi 8 topar qatnasıp, ?1-orındı «Renessans» toparı; ?2-orındı «Olimp» toparı; ?3-orındı «Intellekt» toparı jeńip aldı. Bilim ring oyının shólkemlestiriwde 9-sanlı mektep oqıtıwshısı Daniyarov Nurpolat óz belsendiligin kórsetti.
— Jaslar menen islewdiń jańa basqarıw mexanizmlerin qáliplestiriw, olar menen islewdiń vertikal sistemasın jaratıw, jaslar mashqalaların máhállelerde sheshiw, oqıw orınlarında ruwxıy-aǵartıwshılıq hám tárbiyalıq jumıslardıń nátiyjeliligin elede asırıw, máhállelerde jaslardı Watanǵa sadıqlıq hám milliy qádiriyatlarǵa húrmet ruwxında tárbiyalaw maqsetinde 15-iyun kúni Shımbay rayonı Kónshi máhállesinde rayon prokurorı hám 2-sektor baslıǵı R.Atamuratov máhálle jasları menen ushırastı. Ushırasıwda jaslardıń múrájáát hám usınısları menen tanıstı. Isbilermenlik penen shuǵıllanbaqshı bolǵan jaslar ózleriniń biznes rejelerin tiyisli taraw wákillerine kórsetip, kerekli másláhátlerin aldı. Ushırasıwǵa rayon prokurorınan tısqarı Jaslar isleri agentligi Shımbay rayonlıq bólimi, Shımbay rayonlıq Xalıq bántligine kómeklesiw bólimi, Mikrokreditbank ATB Shımbay filialı, Kónshi máhállesi baslıǵı, hákim járdemshisi hám jaslar jetekshisi qatnastı.
Sonıda aytıp ótiw kerek, Kónshi máhállesi aqsaqalı Tańatar Smetov hám máhálle jaslar jetekshisi Islam Tájimuratova aymaqtaǵı puqaralar halınan xabar alǵan halda, kóshelerdi aralap hám úyme-úy kirip puqaralardıń múrájáát hám usınısların tıńlamaqta
— Tashkent wálayatı Nurafshon qalasında 2005-2010-jıl tuwılg’an jaslar arasında ótkerilgen sporttıń «Bel alıw hám úsh gúres» túri boyınsha Ózbekstan kubogına Qara kól máhállesinen jas palwan qızımız ?Qurbanova Ásel? qatnasıp sıylı ?1-orındı jeńip aldı. Ásel Shımbay rayonı XBBne qaraslı 44-sanlı ulıwma bilim beriw mektebiniń 10-klass oqıwshısı.
— «Bes baslama olimpiadası» sheńberinde Kibersporttıń «CS-GO» túrinen Temir jol gúzari máhállesinen bir qatar jaslar yaǵnıy, Aqılbek Dawletbaev; Alibek Mámbetkarimov; Nurpolat Ómirzaqov; Zamanbek Nurıllaev hám Bekpolat Maratovlar birgelikte Qaraqalpaqstan Respublikası basqıshında qatnasıp sıylı 3-orındı iyeledi.
— 17-iyun kúni Shımbay rayonı Qosterek awıl puqaralar jıyını jaslar jetekshisi Mırzabay Hábipnazarovtiń baslaması menen “Jaslar aylıǵı” sheńberinde Mádeniyat bólimi hám Kitapxana-resurs orayı tárepinen konsert baǵdarlaması shólkemlestirildi. Sonday-aq, “Ózgelerden ózgeshe” komandası ózińiń házilleri menen, Mádeniyat xızmetkerleri intermediya hám qosıqları menen awıl xalqınıń kewil keypiyatın kóterdi.