“5 baslama háreketi Nókis-2022” forumı qalay ótti?

Ózbekstan Respublikası prezidenti tárepinen ilgeri súrilgen “Bes balama” jaslar sıyasatın ámelge asırıw, jaslardıń bos waqtın mazmunlı shólkemlestiriw boyınsha elimizde bir qansha iygilikli isler ámelge asırılmaqta. Bulardıń qatarında “5 baslama háreketi Nókis-2022” forumı Qaraqalpaqstan Respublikasında 3 kún dawamında kóterińki ruwhta shólkmlestirildi. Forumǵa qala-rayonlardan jámi mıńnan artıq student-jaslar qamtıp alındı.  

Forum sheńberinde Jaslar orayında ádebiyat wákilleri menen ushırasıw, kitapqumarlıqtı úgin-násiyatlawǵa baǵarlanǵan “Bilim ring” intellektual oyını, “Fashion night” modalar kórgizbesi hám sport oyınları: jeńil  atletika, shaxmat-shashka, stol tennisi, badminton, armestling, kiber sport hám basqa da is-ilajlar ámelge asırıldı.

Gala koncert qalay ótti?

Hárbir iygilikli istiń baslanıwı hám onıń juwmaǵı da boladı. Hár jılǵıdan da bul forumdı kóterińki ruwhta tamamlaw maqsetinde kúni keshe Sovetskiy atındaǵı qaraqalpaq mámleketlik kórkem-óner hám mádeniyat muzeyi aldında “5 baslama háreketi Nókis-2022” forumınıń saltanatlı gala-koncerti bolıp ótti. Kópten berli kútilgen bayramǵa jıynalǵan tamashagóylerdiń sanı anaǵurlım kóp. Olardıń oyında “Koncert qalay bolar eken?” degen soraw bar. Bul sorawǵa tek ǵana saxna artındaǵı kórkem-óner wákilleri ǵana juwap bere aladı.

Gala koncertke Qaraqalpaqstan Respublikası Joqarǵı Keńesiniń baslıǵı Murat Kamalov, Tashkent qalası hákimi Jahongir Ortiqxojayev hám rayon-qala basshıları, keń jámiyetshilik wákilleri qatnastı.

Qanday da bir bayram, gala koncertler qashan da estrada wákilleri, elimiz súygen qosıqshılarısız ótpeydi. Forumnıń gala koncerti “Nihol” sıylıǵınıń laureatı Nawrız Muhammediyarov atqarıwındaǵı “Xosh kelipsiz Qaraqalpaq eline” qosıǵı menen baslandı. Bunnan keyin Miratdin Abdullaev tárepinen “Nókis qalam”, “Ayqulash” Qaraqalpaq mámleketlik milliy folklor ansambli qosıqshısı Maxset Xojasov atqarıwında “Baxtımsań” qosıqları jıynalǵanlar názerine usınıldı.        

Bunnan tısqarı, estradamızdıń juldızları Baxadir Razimbetov, Aybek Jamalov hám Gulnara Muratbaevalar da “Xit” dárejesine jetken qosıqların atqardı.

Qaraqalpaq estrada juldızlarınıń shıǵıwları juwmaqlanıp, Tashkent qalasınan kelgen “Dubble tuch” ayaq-oyın toparı qatnasıwında shet el oyınları atqarılıp, bárshe miymanlardıń kewil keypiyatın kóteriwine sebep boldı. 

Biz kútken demler jaqın.

Bul forum baslanbastan aldın kópshilik internet tarmaqlarında “Tashkent qalasınan qosıqshılar keledi” sıyaqlı mazmundaǵı hár qıylı xabarlar tarqaldı. Bul qánshelli ıras, haqıyqat? Gala koncertte tamashagóyler qatarınan orın alar ekenmen, men de basında isenbey otırdım. Baslawshı daǵazalaǵan dáslepki miyman: Ózbekstanǵa xızmet kórsetken artist Toxir Sadiqov. Ol óziniń qosıqların atqarmastan aldın, usı forum haqqında biraz toqtalıp ótti. “Men kópshilik wálayatlarda boldım. Biraq Qaraqalpaqstan diyarına kelgenimde ózgeshe zawıqlanıw, bul jerdiń atmosferasın kórip qattı quwandım. Al, jaslardıń umtılısın kórip, men de kóbirek qosıq aytıw imkaniyatı payda boldı. Bunday imkaniyatlardı jaratıp bergen Prezidentimizge raxmet!” dedi, T.Sodiqov.

“Tut qólimdan”, “Mayda-mayda”, “Sevmoq boshqa”, “Dunyo”, “Sanamey” sıyaqlı gigant qosıqları menen belgili bolǵan, kópshilik ıqlasbentlerge iye qosıqshı Yulduz Usmonova forumnıń ajıralmas bólegi edi. Ózbekstan hám Qaraqalpaqstan xalıq artisti Y.Usmonova óziniń “xit” dárejedi qosıqları menen emes, al qaraqalpaqtıń milliy, ólmes qosıǵı bolǵan “Dembermes” penen basladı hám saxnanı lárzege sala aldı. Bárshe oynadı, kúldi hám qosıqshı menen birgelikte fotolarǵa tústi.

Forumnıń saltanatlı gala koncerti usınıń menen juwmaqlanǵan shıǵar, dep oyladım. Biraq onday emes eken. Kerisinshe, jáne bir juldız qosıqshı bar eken. Kópshilik qosıqları menen xalıqtıń muhabbatına sázawar bolıp júrgen artist Munisa Rizayeva da Qaraqalpaqstan diyarına kelipti. Ol tárepinen atqarılǵan janlı hawazdaǵı qosıqlar bársheniń kewlinen shıǵa aldı dep oylayman. M.Rizayeva baǵdarlamanıń ortasında tamashagóyler arasındaǵı bir kishkene balaǵa qaray júzlendi. Ol menen birge duet qosıq ta atqardı. Qullası, gala koncert biz oylaǵanımızdan da zıyada ótti. Bunday úlken forumdı shólkemlestirgeni ushın Tashkent qalası hákimligi, Qaraqalpaqstan Respublikası Joqarǵı keńesine, Jaslar isleri agentligi Qaraqalpaqstan Respublikası basqarmasına bárshe tamashagóylerdiń minnetdarshılıǵı, aytar sózi kóp.

Azizbek Dabılov,

QMUdıń Internet jurnalistikası

tálim baǵdarınıń 3-kurs studenti