Hámmemizge belgili, Prezidentimizdiń baslaması menen 2021-jıl noyabr ayında «Jasıl mákan» ulıwma milliy joybarı járiyalanıp, 200 million túp terek nálin egiw rejelestirilgen edi. Oǵan muwapıq, kóplegen shólkemler, máhálleler, ulıwma keń jámiyetshilik bul sawaplı jumısta jankúyerlik kórsetti. Bıyıl báhár máwsiminde 125 million terek nállerin egiw mólsherlenbekte. Al, usı jıl 1-marttan «Jasıl jıllıq» ulıwma milliy ilajınıń baslanatuǵını járiyalandı.

Usı jıl 11-mart kúni elimiz boylap «Jasıl mákan» joybarı sheńberinde ótkerilip atırǵan usı «Jasıl jıllıq» ulıwmamilliy ilajlarında qatnasıw maqsetinde Moynaq rayonına «Nawayı kán-metallurgiya kombinatı» akcionerlik jámiyeti, «Nawayıuran» mámleketlik kárxanası, «NKMK fondı» mámleketlik mákemesi hám Nawayı mámleketlik kánshilik institutınan jámi 100ge shamalas ıqtıyarlı jaslar kelip, rayonda úsh kún dawamında ekologiyalıq akciyası ótkerildi.

NKMKnıń Jaslar jetekshileri Keńesiniń baslaması menen shólkemlestirilgen usı akciyanı ótkeriwden maqset – «Jasıl jıllıq» ulıwmamilliy ilajında belsene qatnasıń! » súreni astında Aral teńiziniń qurıǵan ultanında seksewil nállerin egiw arqalı «jasıl qaplamalar» jaratılıwında óz úlesin qosıw, Moynaqtaǵı túpkilikli ózgerisler menen tanısıw hám jaslar menen pikir alısıw bolıp esaplanadı.

Ótkerilgen ushırasıwlarda «Nawayı kán-metallurgiya kombinatı» akcionerlik jámiyeti tuwralı maǵlıwmatlar berildi.

Atap ótilgenindey, kombinat dúnyada altın óndiriwshi iri kompaniyalardıń onlıǵına kiredi. Kombinat jer astı baylıqlarınıń qorların geologiyalıq izlew, qazıp alıw hám qayta islewden tayar ónim alıwǵa shekemgi bolǵan óndiris processlerin tolıq ámelge asıratuǵın sanaatlıq klaster bolıp esaplanadı.

«NKMK» AJ Ózbekstan kán-metallurgiya sanaatınıń eń iri kárxanası bolıp esaplanıp, onıń óndirislik bólimleri respublikamızdıń jeti jerinde jaylasqan. 2021-jılı kombinat dúnyadaǵı altın óndiriwshi kompaniyalardıń reytinginde 5-orındı iyeledi.

Ótken jılı kombinattıń respublikadaǵı sanaat ónimlerin islep shıǵarıwdaǵı úlesi 13 procentten artıq bolıp, mámleketlik byudjetke, jámi túsimlerdiń úlesi 20 procentke shamalastı.

Búgingi kúnde «Nawayı kán-metallurgiya kombinatı» akcionerlik jámiyetinde 46 mıńǵa shamalas adam jumıs islemekte. Sonıń 13 mıńnan aslamın jaslar quraydı.

Ilajdıń birinshi kúni dawamında «Jasıl jıllıq» ulıwmamilliy ilajı qatnasıwshıları Aral teńiziniń Moynaq rayonınan 70 kilometr qashıqlıqtaǵı qurıǵan ultanına barıp, 30 mıń túpten aslam seksewil nállerin otırǵızdı.

Ekinshi kúni jergilikli belsendi jaslar menen birge rayonda ushırasıw shólkemlestirildi.

Miymanlar rayondaǵı 1-, 2-, 3-, 4- hám 8-sanlı ulıwma bilim beriw mekteplerine barıp, oqıwshı jaslar menen sáwbetlesiw ótkerildi. Ol jerlerde akciya sheńberinde «Nawayı kán-metallurgiya kombinatı» AJ tárepinen Moynaq qalasındaǵı ulıwma bilim beriw mekteplerine 5 dana zamanagóy kompyuterler toplamı sawǵa etildi. Sonday-aq, 12500 dana elektron kitaplar hám estelik sawǵalar tapsırıldı.

«Nawayı kán-metallurgiya kombinatı» akcionerlik jámiyetiniń Jaslar jetekshileri Keńesiniń belsendileri hám rayondaǵı bilimli jaslar arasında «Zakovat» intellektuallıq oyını ótkerildi. Sonday-aq, NKMK jasları hám Moynaq rayonındaǵı sportqa qızıǵıwshı jaslar arasında sporttıń voleybol túri boyınsha jarıs ótkerildi.

– Men ózim Qaraqalpaqstanlıman. Bul jerge keliwdi qálewshi jaslar kóp edi. Moynaq rayonına seksewil egiwge baramız, -dep qálewshilerdi soraǵanında solardıń arasınan birinshilerden bolıp akciyaǵa qatnasıw tilegimdi bildirdim, -deydi Nawayı mámleketlik kánshilik instutı magistratura baǵdarı studenti Arıslanbek Nietbaev. – Mine, búgin bizler Nawayı mámleketlik kánshilik institutı jámááti menen birgelikte Moynaq rayonı aymaǵın jáne de rawajlandırıw, kóklemzarlastırıw ilajlarına az bolsa da óz úlesimizdi qosıw maqsetinde Nawayı wálayatınan  keldik. Bizler jergilikli jaslar menen tanısıp, sáwbetlestik. Seksewil nállerin otırǵızdıq. Men Moynaqtı kórgenimnen quwanıshlıman. Usınday iygilikli islerge bárshe puqaralarımızdı belsene qatnasıwǵa shaqırıp qalamız.

Ilaj dawamında jaslar rayonnıń dıqqatqa ılayıq orınlarına barıp, Moynaq rayonınıń tariyxı, sońǵı jıllarda ámelge asırılǵan jumıslar, jetiskenlikler menen tanıstı.

Á.Jiemuratov,

Qaraqalpaqstan xabar agentligi