“Balalar háreketi” sárdarlar baslaması menen 10-18 jastaǵı kitapqumar jaslardıń qatnasıwında shólkemlestirilgen “Book Battle” haqıyqıy bilim hám pikirlew maydanına aylandı. Tańlaw dawamında qatnasıwshılar oqıǵan kitapları haqqında aytıp, shıǵarmalarda keltirilgen qaharmanlardıń minez-qulqı, olardıń basınan ótken waqıyalar hám avtor jetkizbekshi bolǵan tiykarǵı pikirler boyınsha qızıqlı pikir-talaslar alıp bardı. “Book Battle” ushın “Mutolaa” mobil qosımshası arqalı: Mark Twennıń “Tom Soyerdiń basınan keshirgenleri”, Shıńǵıs Aytmatovtıń “Birinshi muǵallim” kitapları tańlap alınǵan edi. Jarıs tek ǵana bilim sınaǵı emes, al jaslardıń sóylew mádeniyatı, sın kózqarastan pikirlew hám topar menen islesiw kónlikpelerin rawajlandırıwǵa da xızmet etti. Hár bir qatnasıwshı óziniń kitapqa bolǵan muhabbatı hám intellektuallıq potencialın kórsetti. Kitap – pikirlew, mánawiyat hám tabısqa alıp barıwshı eń jaqın jol. “Book battle”dıń keyingi sanında biz sizdi kútip qalamız, tez arada jańa kitaplar járiyalanadı.