RÁSMIY MÚNÁSIBET Sociallıq tarmaqlarda “Hújjetler toplamı” Telegram kanalında Qaraqalpaqstan Respublikası Tórtkúl rayonındaǵı jaslar jetekshileri atınan rayonlıq Jaslar isleri bólimi baslıǵınıń jumısına baylanıslı múrájat járiyalanǵan edi. Bul múrájatta keltirilgen jaǵdaylar Qaraqalpaqstan Respublikası Jaslar isleri basqarması tárepinen úyrenildi. Úyreniw dawamında rayon jaslar jetekshileri menen ushırasıw hám jeke tártiptegi sáwbetler ótkerilip, múrájatta atap ótilgen jaǵdaylarǵa anıqlıq kirgizildi. Úyreniwler nátiyjesinde múrájatta keltirilgen ayırım maǵlıwmatlar jetekshiler tárepinen tastıyıqlanbadı. Sonday-aq, jaslar jetekshilerinen turaqlı túrde pul qarjıları jıynalǵanı haqqındaǵı maǵlıwmatlar boyınsha da tastıyıqlawshı jaǵdaylar anıqlanbaǵanlıǵın málim etemiz. Basqarma barlıq tiykarlı múrájat hám sın pikirlerdi ashıq hám qalıs úyreniwge, zárúr jaǵdaylarda tiyisli ilajlar kóriwge tayar. Biz Jaslar sholkemi iskerligine biypárwa bolmaǵan barlıq ǵalaba xabar quralları, blogerler hám jámiyetshilik wákillerine óz minnetdarshılıǵımızdı bildiremiz. Qaraqalpaqstan Respublikası Jaslar isleri basqarması