Usı jıldıń 21-22-fevral kúnleri Nókis qalası Jaslar orayında qala hákimi U.Panayev hám Tashkent qalası hákimi J.Ortıqxójayevlar jaslar menen ushırasıp, olardıń usınısların úyrengen edi.

Ushırasıw dawamında «Tuńǵısh qonıs» máhállesi jaslar jetekshisi óz máhállesi aymaǵında «Nuraniyler dem alıw orayı»n shólkemlestiriw usınısı menen shıqqan edi. Usınıs hákimler tárepinen qabıl etilip, bul joybar ushın materiallıq kómek beriliwin aytıp ótken edi.

Búgingi kúnde Nókis qalası «Tuńǵısh qonıs» máhállesinde oray qurılıs jumısları baslap jiberilgen bolıp, obyekt Nawrız bayramınan aldın xalıq xızmetine tapsırılıwı joybarlastırılǵan.

Máhálle jetekshisi Q.Lepesov oray haqqında sóyler eken, bul jerde nuraniylerdiń waqıtların mazmunlı shólkemlestiriw maqsetinde shaxmat-shashka, kitaplar múyeshleri, sonday-aq, «Bir nuraniyge on jas» uranı astında «Úsh áwlad ushırasıwları» shólkemlestiriliwin aytıp ótedi.