Búgin, Qońırat rayonında Jaslar isleri agentligi Qaraqalpaqstan Respublikası basqarması baslıǵı wazıypasın atqarıwshı Ikram Abdikalikov aymaq jasları hám jaslar jetekshileri menen ushırastı.

Ushırasıwda rayon hákimi Bekzod Madaminov, bir qatar mákeme,  kárxana, shólkemler basshıları, rayon sárdarları qatnasıp, jaslar turmısındaǵı túpten ózgerisler haqqında ashıqtan-ashıq sáwbetlesti.

Ashıq sáwbet kórinisinde ótkerilgen ushırasıwda Ikram Abdikalikov Jaslar isleri agentligi Qońırat rayonlıq bólimi baslıǵına usınılǵan kandidaturalardan múnásip talaban Kazaxbayev Tazabay Redjepbayevichti jaslarǵa tanıstırdı.

– Úlken isenim menen tayınlanıp atırǵan Tazabay Qazaqbaev kóp jıllar dawamında jaslar siyasatı sistemasında jumıs alıp bardı. Onıń tájiriybesine isengen halda,  qońıratlı jaslardan jańa baslamalardı kútip qalamız,  – dedi I.Abdikalikov.

Ushırasıw soraw-juwaplar menen dawam etti.

Búgingi kúnde Qońırat rayonında 39 awıl hám máhálle puqaralar jıyınları bar bolıp, olardıń hár birine jaslar jetekshileri saylanǵan. Máhálle jetekshilerine máhálle jaslarınıń kitapqumarlıǵın asırıw,  olardı ilim-bilimge baǵdarlaw jolında jańa joybarlardı jolǵa qoyıw usınıs etidi hám bul jetekshilerge respublika jasları gazetası bolǵan «Yoshlar ovozi» gazetasınıń jańa sanı tapsırıldı.

–Pútkil Ózbekstan jaslarınıń imkaniyatları hám olar tárepinen ilgeri súrilgen baslamalardan shetki aymaq jaslarınıń xabarı bolıwı zárúr. Olar da bul imkaniyatlardan paydalanıwǵa haqılı,  – I.Abdikalikov. – Durıs,  jaslarımız sociallıq tarmaqlar arqalı informaciyalar aǵımında tezlikke iye bolıwı múmkin. Biraq,  bul informaciyalardı gazeta tilinde,  keń mánide oqıǵannıń parqı bar. Sonlıqtan,  máhálle jaslarınıń bul gazetalardı oqıwın hám keń dúnyaqaras,  jeke pikirge iye bolıwına jaqınnan járdem kórsetiwimiz tiyis.

Sonday-aq,  ushırasıwda rayondaǵı jaslar jetekshilerine úlgi bolıp atırǵan «Mıńjarǵan» máhallesi jaslar jetekshisi Ulbosin Mambetyarovaǵa Jaslar isleri agentligi tárepinen kompyuter toplamı hám reńli printer tapsırıldı.