Kechirasiz, bu matn faqat Qaraqalpaqsha tilida mavjud. Для вашего удобства, содержание ниже показано на доступном языке. Вы можете нажать на ссылку, чтобы изменить язык всего сайта.

Máhállelerde jaslar menen islesiw máselelerin muwapıqlastırıw boyınsha Respublikalıq komissiyanıń baslıǵı Qahramon Quronboev Qaraqalpaqstan Respublikasına keldi.

Sapar sheńberinde Jaslar máseleleri boyınsha respublikalıq komissiyanıń májilisi Qaraqalpaqstan Respublikası Ministrler Keńesiniń májilisler zalında bolıp ótti. Onda juwapkerlerge bir qatar áhmiyetli tapsırmalar berildi hám jaslar menen islesiwdegi bar mashqalalar hám olardı sheshiw jolları dodalandı.

Bunnan soń Qahramon Quronboev Nókis qalasınıń «Ǵarezsizlik» máhállesinde jaylasqan «IT Park»ke bardı. Ol jerde qábiletli jaslardıń startap joybarları, Prezident qararlarına tiykarlanıp (PQ-153 hám PQ-62-sanlı) jer hám kredit alǵan jaslardıń ónimleri menen jaqınnan tanıstı. Jaslar menen ashıqtan-ashıq pikirlesiw ótkerilip, olardıń usınıs hám baslamaları tıńlandı.

Sapar sheńberinde Nókis qalasındaǵı «Aydın jol» máhállesinde jasaytuǵın, 21131-áskeriy bólim komandiri Ǵolib Toshniyazovqa biriktirilgen jas – Nazira Jaqsımuratovanıń shańaraǵına da barıldı. Onıń shańaraǵına járdem sıpatında úydiń bir bólegi buzılıp, qayta qurıp berilgen.

Sonday-aq, Nókis qalasınıń «Jasıl baǵ» máhállesinde jaylasqan NMPIniń studentler dala ámeliyatı ótip atırǵan aymaǵında «Áhmiyetli 90 kún» sheńberinde shólkemlestirilgen «Studentler dem alıw orayı»na da barıldı. Bul jerde studentler ushın jaratılǵan sharayatlar kózden ótkerildi.

Ámiwdárya rayonındaǵı máhállelerdiń birinde PQ-153-sanlı qarar tiykarında jer ajıratılǵan jas fermerler menen ushırasıw bolıp ótti. Usenov Salamat 50 mln sum kredit alıw tilegin bildirdi, oǵan járdem sıpatında sıyır sawǵa etildi. Sonday-aq, Yo’ldashov Asqar (20 sotix geshir ekken, jıllıq dáramatı 45 mln) hám Urazaliev Sayidahmad (60 sotixta qawın-ǵarbız jetistirip, 60 mln dáramat alǵan) óz jumısların tanıstırdı.

Bul sapar sheńberinde jaslardıń turmısı, olardıń mashqalaları hám arzıw-niyetleri menen jaqınnan tanısıw, mámleket tárepinen kórsetilip atırǵan imkaniyatlardıń ámeldegi nátiyjelerin kóriw hám bahalawǵa úlken itibar qaratıldı.