Qaraqalpaqstan Respublikası Joqarǵı Keńesiniń Baslıǵı basshılıǵında ótkerilgen májlis dawamında berilgen tapsırmaǵa muwapıq 6 mıń jas ushın 5 mıń gektar jer maydanları ajıratılıwı belgilengen. Tapsırmaǵa tiykar, barlıq rayonlarda jer alıw niyetin bildirgen jaslar dizimi qáliplestirilip, jaslarǵa ajıratılatuǵın jer maydanları tanıstırılıp shıǵıldı.
Búgingi kúnge shekem 7 mıń 664 jas (5 mıń 52 gektar) aukcion sawdalarına qatnasıp jeńimpaz dep tabıldı. Sonnan 7 612 jas tárepinen 5 009 gektar jer maydanı egilip búgingi kúnde tárbiyalaw jumısları alıp barılmaqta.
Qalǵan jer maydanlarına E-Auksion.uz elektron sawda platformasında sawda múddetleri boyınsha arza tapsırıw jumısları alıp barılmaqta.
Búgingi kúnde jas diyqanlardıń dáramatqa kirip atırǵan ónimleri, aymaqlardaǵı ishki bazarlarǵa alıp shıǵılmaqta. Ásirese, ámiwdáryalı jaslar jerge ayrıqsha mehir berip, ajıratılǵan jer maydanlarınan maqsetli paydalanǵan halda óz bántligin ózleri támiyinlep, sap dáramatqa iye bolmaqta.
Ámiwdárya rayonında 1103 jasqa 401 gektar jer maydanı ajıratıp berilgen edi. Búgin, 17-avgust kúni Ámiwdárya rayonı Manǵıt diyqan bazarında “Jaslarǵa ajıratılǵan jer maydanlarında awıl-xojalıǵı ónimleri yarmarkası” shólkemlestirildi.
Yarmarkaǵa 100ge jaqın jas diyqanlar qatnasıp, óz ónimlerin tutınıwshılarǵa arzan bahada sattı. Yarmarkada xalıq qol jetimli bahada ónimlerdi alıp, jas diyqanlarımız jetistirgen ónimlerinen kewli tolıp, yarmarka shólkemlestiriwshilerine minnetdarshılıq bildirdi.
Ótkerilgen yarmarka jaslardıń dáramatların tezlestiriw, ónimleriniń bazarın tabıwına jaqınnan kómeklesiwde ayrıqsha áhmiyetke iye.