Ózbekstan Respublikası Prezidentiniń «Jaslardı shet tillerge oqıtıw sistemasınıń nátiyjeliligin arttırıw boyınsha qosımsha ilajlar haqqında»ǵı 239-sanlı qararı qabıl etildi. Oǵan bola, jaslar ushın tómendegi jańa imkaniyatlar jaratıldı:

1. Xalıqaralıq imtixan sistemaları boyınsha (inglis, nemis, francuz, koreys, qıtay hám yapon tilleri) C1 yamasa oǵan teńlestirilgen sáykes dárejedegi sertifikat alǵan jaslardıń oqıw ǵárejetlerin qaplaw ushın BEMniń 3 esesi (1 mln 20 mıń sum) muǵdarında bir mártelik materiallıq xoshametlew sisteması engiziledi;

2. 2024-jıl 1-sentyabrden baslap jaslardıń (nemis, francuz, koreys, qıtay hám yapon tilleri) xalıqaralıq imtixan sistemalarında imtixan tapsırıw ǵárejetleri qaplap beriliwi ushın olar tárepinen toplanıwı kerek bolǵan balldıń minimal kórsetkishi bir baǵanaǵa túsiriledi;

3. Joqarı oqıw orınlarınıń shet til filologiyası tálim baǵdarı boyınsha 3-4-kursta oqıp atırǵan hám keminde C1 dárejedegi sertifikatqa iye studentlerdiń oqıtıwshı sıpatında islewine ruxsat beriledi;

4. Ata-analar hám oqıwshılar talabınan kelip shıqqan halda qánigelestirilgen mekteplerde hám kásip-óner mekteplerinde shet tili sıpatında nemis, francuz, koreys, qıtay hám yapon tillerin oqıtıw jolǵa qoyıladı;

5. Shet tiller hám zamanagóy kásiplerdi úyretiw boyınsha dúnyanıń jetekshi orayları, joqarı oqıw orınları menen birge islesiw jolǵa qoyıladı hám olardıń xalıqaralıq bilimlendiriw standartlarına sáykes tálim baǵdarlamaları «Ibrat perzentleri» jáne «Ustaz» joybarlarına biriktiriledi;

6. Alıs hám shetki aymaqlarda jumıs alıp barıwshı eń joqarı kórsetkishke iye 100 jeke-menshik oqıw orayınıń bilimlendiriw procesinde paydalanatuǵın imaratı ushın ijara tólemi ǵárejetleriniń bir bólegi kompensaciya etiledi;

7. Ulıwma orta bilim beriw mákemeleriniń xanaların tálim procesinen bos waqıtta kásip-óner hám shet tillerdi oqıtıwdı ámelge asırıw ushın tikkeley shártnamalar tiykarında biypul paydalanıw huqıqı menen jeke-menshik oqıw oraylarına beriwge ruxsat etiledi.