Usı jıldıń 25-may kúni Jaslar orayı imaratı aldında Qaraqalpaqstan Respublikası Joqarǵı Keńesiniń qollap-quwatlawı menen Ózbekstan Jaslar isleri agentligi Qaraqalpaqstan Respublikası jaslar isleri basqarması tárepinen «Pitkeriwshi party» festivalı shólkemlestirildi.

Kreativ atmosferadaǵı gala-koncertte DJ shou baǵdarlaması, diskoteka, kewil ashar joybarlar, sonday-aq, qaraqalpaq estradası juldızları hám «Bozataw FEST» tańlawınıń jeńimpazları tárepinen atqarılǵan qosıqlar bárshege joqarı keypiyat baǵıshladı.

Joqarı shólkemleskenlik penen shólkemlestirilgen ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev sózge shıǵıp, barlıq pitkeriwshilerdi sáne múnásibeti menen qızǵın qutlıqladı hám keleshektegi oqıwlarında, jumıslarında tasqın tabıslar bolıwın tiledi.

Bunnan soń húrmetli Prezidentimizdiń ǵamxorlıǵı nátiyjesinde elimizdiń jaslarına jaratıp berilip atırǵan imkaniyatlarǵa toqtaldı. Haqıyqatında da, bir ǵana ótken jıldıń ózinde tek ǵana qaraqalpaqstanlı jaslar ushın qosımsha túrde 3000 grant, 6500 tólemli kontrakt ornı ajıratıldı.

Bunıń nátiyjesinde 9500 jas student atanıp, quwanıshqa bólendi. Usınday iygilikli jumıslar bıyılǵı jılı da dawam ettiriledi. Sebebi, Ózbekstan Respublikası Prezidentiniń 2022-jıl, 31-avgust kúngi PP-213-sanlı Pármanınıń 10-bántinde hár jılı Qaraqalpaqstan Respublikasınan 6500 jastıń wálayatlardaǵı mámleketlik joqarı oqıw orınlarına qosımsha qabıllaw parametleri tiykarında oqıwǵa qabıllanıwı belgilengen.