Bozataw talantlılardı júzege shıǵaradı. Áyne usı uran astında shólkemlestirilgen Bozataw-FEST — Jaslar hawazı festivalı respublikalıq final basqıshınıń ashılıw saltanatı Nókis qalasındaǵı oraylıq amfiteatrda kóterińki ruwxta bolıp ótti.

Ilajda sózge shıqqan Qaraqalpaqstan Respublikası Joqarǵı Keńesiniń Baslıǵı Amanbay Orınbaev mámleketimizde jaslar ushın jaratılıp atırǵan imkaniyatlarǵa keńnen toqtalıp ótti.

Bunan tısqarı ashılıw saltanatında qatnasqan Jaslar isler agentligi direktorınıń birinshi orınbasarı Dilnoza Kattaxonova bolsa «Jaslar hawazı» tańlawınıń áhmiyeti, bıyılǵı jılda kózge taslanıp atırǵan jańalıqlar haqqında sóz etti.

Ózbek hám qaraqalpaq estrada juldızları qatnasıwında shólkemlestirilgen gala-koncert tańlaw qatnasıwshıları hám olardıń jaqınları, bunnan tısqarı, Nókis qalası xalqı ushın da kesheniń haqıyqıy bayramǵa aylanıwına sebepshi boldı.

Koncert juwmaǵında shólkemlestirilgen solyutlar shousı ilajdıń eń kulminaciyalıq noqatı boldı.