Usı jıldıń 10-may kúni Nókis qalasındaǵı Oraylıq amfiteatrda «Bozataw FEST» jaslar hawazı tańlawınıń 2022-jılǵı máwsimi final basqıshına saltanatlı túrde start berildi.

Festivaldı «Nihol» sıylıǵınıń laureatı Salamat Ayapov óziniń milliyligimizge say «Bir páriy» qosıǵı menen baslap berdi. Sonday-aq, ilaj qaraqalpaq hám ózbek estradası wákilleriniń yoshlı namalı qosıqları menen dawam etti.

Ashılıw máresimine Qaraqalpaqstan Respublikası Joqarǵı Keńesiniń Baslıǵı M.Kamalov, Qaraqalpaqstan Respublikası Joqarǵı Keńesi Baslıǵınıń orınbasarı A.Davletov, Qaraqalpaqstan Respublikası Ministrler Keńesi baslıǵı Q.Sariev hám Qaraqalpaqstan Respublikası Ministrler Keńesi baslıǵınıń orınbasarı A.Daniyarovlar qatnastı.

Ilajda Qaraqalpaqstanǵa xızmet kórsetken artist Bayram Perdebaev óziniń «Ózbekstan» qosıǵı menen festivalǵa juwmaq jasadı hám bayram salyutları atıldı.

Maǵlıwmat ushın atap ótiw orınlı, jeńimpaz bolǵan talantlı jaslar: 1-orın 50 million sum, 2-orın 30 million sum, 3- million sum hám respublika basqıshına shıqqan barlıq qatnasıwshılar 10 million sumnan pul sıylıǵı menen sıylıqlanadı.

Esletip ótemiz, «Bozataw FEST» 10-15-may kúnleri aralıǵında bolıp ótedi. Festivaldiń sıylıqlaw máresimi 15-may kúni Bozataw rayonındaǵı Oraylıq stadionda ótkeriledi.

Jabılıw máresimine baslawshılar Amirxon Umarov hám Aysánem Yusupova, sonday-aq, miymanlardan Shoxrux, «Bojalar» toparı, Shahlo Ahmedova hám Sardor Toirovlardıń qatnasıwı kútilmekte.

Bekbergen Adilbaev, reportyor