Ájiniyaz atındaǵı Nókis mámleketlik pedagogikalıq institutı Pedagogika fakulteti muzıkalıq tálim baǵdarınıń 4-kurs studenti, jas jıraw Dáwranbek Endirbaev «Nihol» mámleketlik sıylıǵınıń laureatı boldı.

Búgin, 15-aprel kúni Tashkent qalasında bolıp ótken saltanatlı sıylıqlaw máresiminde Dáwranbek Endirbaevqa mámleketlik sıylıq statuetkası hám diplom tapsırıldı.

D.Endirbaev 2018-jılı Nókis mámleketlik pedagogikalıq institutınıń muzıkalıq tálim baǵdarına oqıwǵa kirip, búgingi kúnge shekem jırawshılıq hám muzıka sırların tájiriybeli professor-oqıtıwshılardan tereń ózlestirip kelmekte.

Ol institut hám respublikalıq kólemde shólkemlestiriletuǵın bayram saltanatları, koncert baǵdarlamalarında belsene qatnasıp kelmekte.

2019-jılı Qazaqstan Respublikası Almatı qalasında bolıp ótken xalıqaralıq kóp janrlı IV «Gloria» tańlaw-festivalında, sonday-aq, 2020-jıl Franciyanıń Parij qalasında «Art Line» xalıqaralıq federaciyası tárepinen ótkerilgen «PRO ART» xalıqaralıq kóp janrlı tańlaw-festivalında da 1-orındı iyeledi.

D.Endirbaev jırawshılıq kórkem óneri arqalı elimizdiń bay mádeniyatın dúnya júzine alıp shıǵıwda, ata-babalarımızdıń miyrasın keleshek áwladlarǵa jetkerip beriwde óziniń úlesin qosıp kelmekte.

Maǵlıwmat ornında atap ótiw kerek, 2019-jılı Ájiniyaz atındaǵı Nókis mámleketlik pedagogikalıq institutı muzıkalıq tálim baǵdarınıń eki studenti – Muhammed Tórebekov hám Ádilbek Baxtıbaevlar usı sıylıqtıń laureatları bolǵan edi.

NMPI baspasóz xızmeti.