Búgin, 8-aprel kúni Nókis qalasındaǵı Jaslar orayında Ájiniyaz atındaǵı Nókis mámleketlik pedagogikalıq institutı tárepinen AQShtıń Ózbekstandaǵı Elshixanasınıń «English Access Microscholarship Program» grant joybarı sheńberinde «XXI ásirde inglis tilin oqıtıw kónlikpelerin rawajlandırıw» atamasındaǵı xalıqaralıq ilimiy-ámeliy konferenciya óz jumısın basladı.

Konferenciyaǵa AQSh Elshixanasınıń wákilleri, wálayatlardaǵı joybarlardıń koordinatorları hám inglis tili páni oqıtıwshıları, ǵalaba xabar quralları wákilleri qatnastı.

Konferenciyanı institut rektorı Bayrambay Otemuratov ashıp berip, búgingi kúnde elimizde shet tillerin oqıtıwda zamanagóy pedagogikalıq texnologiyalardan paydalanǵan halda oqıtıwdıń aldınǵı usılların qollanıw, shet tillerin tereń meńgergen hám usı tillerde óz pikirlerin erkin bildire alatuǵın maman kadrlar tayarlaw máselesi mámleketlik siyasat dárejesine jetkenligin atap ótti. Ótkerilip atırǵan konferenciya inglis tilin oqıtıwda úlken tájiriybe almasıw maydanı, sonday-aq, tarawdaǵı mashqalalardı saplastırıw, oqıtıw procesin bunnan bılay da jetilistiriw ushın zárúr usınıslar islep shıǵıwda áhmiyetli ekenligin atap ótip, konferenciya jumıslarına hám qatnasıwshılarına tabıslar tiledi.

Ilajda AQShtıń Ózbekstandaǵı Elshixanası wákili Amanda Xobson, koordinator Feruz Akobirov shıǵıp sóylep, konferenciyanıń áhmiyeti haqqında jıynalǵanlarǵa maǵlıwmatlar berdi. Sonday-aq, joybardıń Qaraqalpaqstan Respublikası hám Xorezm wálayatı boyınsha treneri Maurin Runi dóretiwshilik hám qızıqlı etip jazıw kónlikpelerin arttırıw boyınsha prezentaciya isledi.

AQSh Elshixanası járdeminde usı joybar sheńberinde Qaraqalpaqstan Respublikasında, sonday-aq, Ózbekstannıń barlıq wálayatlarında filialları ashılǵan bolıp, ol jerlerde 13-17 jas aralıǵındaǵı balalarǵa inglis tilin oqıtıw hám kónlikpelerin arttırıw jumısları ámelge asırılmaqta.

— Búgingi kúnde oqıwshılarǵa XXI ásir kónlikpeleri hám usılları járdeminde inglis tilin oqıtıwdıń áhmiyeti joqarı. Biziń baslı wazıypamız oqıtıwshılardıń zamanagóy informaciyalıq texnologiyalardan paydalanıw kónlikpelerin, virtuallıq oqıtıw boyınsha innovaciyalardı rawajlandırıwdan ibarat. Búgingi ótkerilip atırǵan konferenciya qatnasıwshılar biri-biri menen óz ara tájiriybe almasıp, inglis tilin oqıtıwda jańa usıllar, texnologiyalardı ózlestiriwi menen áhmiyetli, — deydi instituttıń inglis tili hám ádebiyatı kafedrası docenti, joybar koordinatorı Dina Mamırbaeva.

Konferenciya óz jumısın sekciyalarǵa bólingen halda dawam ettirdi.

Konferenciya erteń, 9-aprel kúni óz jumısın juwmaqlaydı.

NMPI baspasóz xızmeti.