Ózbekstan Respublikası Prezidentiniń «Mámleketlik pensiyalar, napaqalar, kompensaciyalar hám basqa sociallıq tólemlerdi tólew sistemasın ele de jetilistiriwge qaratılǵan qosımsha is-ilajlar haqqında»ǵı qararı qabıl etildi. Hújjet teksti ÓzA saytında járiyalanǵan.

Qararǵa muwapıq, usı jıldıń 1-oktyabr sánesine shekem xalıqtı bankomatlar menen qamtıp alıw dárejesin asırıw maqsetinde shet el mámleketlerinen 1800 bankomat alıp kelinedi.

Hújjet tiykarında, usı jıl juwmaǵına shekem pensiya hám napaqa alıwshılarǵa ele de qolaylıq jaratıw maqsetinde olardıń pulların aralıqtan basqarıw múmkinshiligin beriwshi «Xalıq banki»niń jańa mobil qosımshası islep shıǵıladı.

2022-jıl 1-sentyabrge shekem áskeriylestirilgen sistema pensiyaların esaplaw hám olardıń tólem esap-kitapları sistemasın tiyisli ministrlik-keńseler tárepinen avtomatlastırıw arqalı xızmet kórsetiwshi kommerciyalıq banklerde pensiya betlerin júrgiziw ámeliyatı biykar etiledi.

Sonday-aq, 2022-jıldıń 1-may sánesinen baslap:

● pensiya hám napaqa alıwshılar «Xalıq banki»niń kóshpeli kassaları tárepinen ámelge asırılǵan pensiyanı jetkerip beriw xızmeti ushın 1 procent muǵdarında bankke xızmet haqı tóleydi;

● pensiyanı bank kartaları arqalı alıwshılarǵa hár aylıq pensiya pulınıń 1 procenti muǵdarında qosımsha tólem engiziledi;

● banktiń kóshpeli kassaları arqalı máhálle puqaralar jıyınına barǵan halda pensiya hám napaqa alıwshılardıń kartalarındaǵı pulları olardıń qálewine kóre naq pulǵa almastırıp beriledi;

● materiallıq járdem pulları pensiya hám napaqalar menen bir waqıtta «Xalıq banki»niń kóshpeli kassaları tárepinen máhállelerge jetkerip beriledi.

Bekbergen Adilbaev, reportyor