Ájiniyaz atındaǵı Nókis mámleketlik pedagogikalıq institutı Fizika-matematika fakultetiniń 4-kurs studenti Sayora Barlıqbaeva Ózbekstan Respublikası kóleminde Registon bilimlendiriw joybarı, Joqarı hám orta arnawlı bilimlendiriw ministrligi, sonday-aq, OLIYGOH.UZ platforması menen birgelikte studentler ushın shólkemlestirilgen «Registon stipendiyası» tańlawınıń jeńimpazı boldı, dep xabar bermekte NMPI baspasóz xızmeti.

Tańlawǵa Ózbekstan kóleminde 80 mıńnan aslam studentler qatnasıp, olar eki ay dawamında 3 basqıshtan ibarat bolǵan imtixan sistemasında óz bilimlerin sınaqtan ótkerdi.

Tańlaw komissiyası tárepinen xalıqaralıq kategoriyadaǵı stipendiya joybarları úyrenip shıǵılǵan halda talabanlardıń nátiyjeleri járiyalandı.

Stipendiya tańlawınıń jeńimpazı bolǵan NMPI studenti Sayora Barlıqbaevaǵa «Registon stipendiyası jeńimpazı» arnawlı gúwalıǵı, estelik sawǵalar hám aqshalay sıylıq saltanatlı túrde tapsırıladı.