Ájiniyaz atındaǵı Nókis mámleketlik pedagogikalıq institutında studentlerdiń bos waqıtların mazmunlı ótkeriw, jaslardıń Prezidentimiz tárepinen alǵa súrilgen bes baslama tiykarında muzıka, súwretlew óneri, ádebiyat, teatr hám kórkem ónerdiń basqa túrlerine qızıǵıwshılıǵın arttırıw, salamat turmıs tárizin qáliplestiriw, málimleme texnologiyaları boyınsha bilim hám kónlikpelerin jetilistiriw, olardıń ruwxıy dúnyasın bayıtıw, kitapqumarlıqtı keńnen úgit-násiyatlaw maqsetinde ámelge asırılatuǵın jumıslar jobası islep shıǵılǵan.

Usı tiykarda institut studentleri arasında qısqı dem alıs waqtında matematika, informatika, tariyx hám shet tilleri (inglis tili) boyınsha onlayn pán olimpiadaları, Watan qorǵawshıları kúni múnásibeti menen videorolikler, plakatlar, qosıqlar hám shıǵarmalar tańlawları, «Qıs kórki», «Men súyip oqıytuǵın dóretiwshi», «Tınısh-tatıwlıqta jasap atırǵan kóp milletli Ózbekstan xalqı» atamalarındaǵı fotosúwretler hám videorolikler tańlawları, sonday-aq, barlıq fakultetler arasında «Zakovat» intellektual oyını ótkerilgen edi.

Tańlawlarǵa kelip túsken materiallar arnawlı dúzilgen jumısshı topar hám tóreshiler quramı aǵzaları tárepinen kórip shıǵılıp, instituttıń rásmiy veb-saytı hám sociallıq tarmaqlardaǵı rásmiy kanalları arqalı kópshiliktiń dıqqatına usınıp barıldı.

Ótkerilgen tańlawlar nátiyjelerine muwapıq jeńimpaz dep tabılǵan hám sıylı orınlardı iyelegen studentler, fakultetlerden qatnasqan komandalardıń aǵzaları institut rektoratı tárepinen húrmet jarlıqları, sonday-aq, kompyuter komlekti, noutbuk, planshet, mobil telefon, turmıslıq texnikalar sıyaqlı qımbat bahalı sawǵalar menen sıylıqlandı.

Sıylıqlaw ilajında Qaraqalpaqstan Respublikası Ministrler Keńesi Baslıǵınıń orınbasarı Abatbay Dániyarov hám institut rektorı Bayrambay Otemuratov sózge shıǵıp, bunday ilajlar elimizde jaslar siyasatı, olarǵa berilip atırǵan itibar hám ǵamqorlıqlardıń ayqın kórinisi ekenligin atap ótti. Barlıq jeńimpaz bolǵan studentlerdi qutlıqlap, aldaǵı oqıw hám ilimiy-izertlew, dóretiwshilik jumıslarında tabıslar tiledi.

NMPI baspasóz xızmeti.