«Kun.uz» saytı házirgi waqıtta magistraturanıń 1-basqıshında oqıp atırǵan, kelesi jılı 2-basqıshqa ótetuǵın studentlerdiń de magistratura pulı qaplanıwı yamasa qaplanbawı haqqında Joqarı hám orta arnawlı bilimlendiriw ministrliginen maǵlıwmat aldı.

Ministrlik málimleme xızmetiniń «Kun.uz»ǵa málim etiwinshe, kelesi oqıw jılında magistraturada oqıp atırǵan barlıq qızlardıń kontrakti mámleket tárepinen qaplanadı, yaǵnıy kelesi oqıw jılında 2-basqısh studenti bolatuǵın hayal-qızlardıń da oqıwı biypul boladı.

«7-marttaǵı «Shańaraq hám hayal-qızlardı sistemalı qollap-quwatlawǵa baylanıslı jumıslardı bunnan bılay da jedellestiriw ilajları haqqında»ǵı prezident pármanında mámleketlik joqarı oqıw orınlarınıń magistratura basqıshında oqıp atırǵan barlıq hayal-qızlardıń kontrakt tólemleri qaytarıw shártisiz qaplap beriliwi belgilengen.

Onda 2022-2023-oqıw jılınan tólemli kontrakt tiykarında 1-basqıshqa qabıl etiletuǵın, sonday-aq, usı oqıw jılında 2-basqıshqa ótken magistr hayal-qızlardıń kontrakt tólemleri qaytarıw shártisiz qaplap beriliwi názerde tutılǵan», – dep málim etken ministrlik «Kun.uz»ǵa bergen maǵlıwmatında.

Esletip ótemiz, hayal-qızlardıń magistraturada oqıw qárejetlerin qaplaw ushın mámleket tárepinen 23 mıń qızǵa 200 milliard sum ajıratılıwı belgilengen.

Qaraqalpaqstan xabar agentligi.