Koronavirustıń «omicron» shtammı kóbinese balalarda bronxlarǵa tásir etedi, sol sebepli bala emlewxanaǵa hám hátteki reanimaciyaǵa da túsip qalıwı múmkin. Bul haqqında Rossiya ilimler akademiyasınıń aǵzası Aleksandr Gorelov málim etti.

«Balalarda kesellik ótiwiniń belgili bir belgileri anıqlanǵan – kesellik stereotipikalıq tárizde baslanadı, biraq kóbinese bronxiolittiń payda bolıwı baqlanadı, bul bolsa májbúriy medicinalıq járdemdi talap etedi, bir waqıtları bolsa emlewxanaǵa, hátteki, reanimaciyaǵa da túsip qalıwı múmkin. Bunnan tısqarı, hár úshinshi balada diareya baqlanbaqta», deydi Gorelov.
Qánigelerdiń sózlerine bola, ádette bunday belgiler eki jastan bes jasqa shekemgi balalarda ushırasadı.
Gorelov, sonday-aq, balalarda koronavirustı qayta juqtırıw itimalın da biykarlamadı.
Bıyılǵı jıldıń 7-yanvarı kúni Ózbekstanda «omicron» shtammı menen kesellengen birinshi nawqas anıqlanǵan.

Qaraqalpaqstan xabar agentligi