Mámleketlik qáwipsizlik xızmeti kuboginiń Qaraqalpaqstan Respublikası basqıshına shek taslandı Jaslar orayı imaratında Mámleketlik qáwipsizlik xızmeti kubogi jarıslarınıń Qaraqalpaqstan Respublikası basqıshına start berildi hám komandalar arasında shek taslaw máresimi bolıp ótti. Elimizde jaslardıń bos waqtın mazmunlı shólkemlestiriw, olardı ǵalabalıq sportqa keńnen tartıw hám jaslar arasında salamat turmıs tárizin qáliplestiriw maqsetinde hár jılı sporttıń futbol, mini-futbol hám shaxmat túrleri boyınsha “Mámleketlik qáwipsizlik xızmeti kubogi” ótkeriw dástúrge aylanǵan. Usı jılı da bul sport jarısların joqarı dárejede shólkemlestiriw hám ótkeriw boyınsha keń kólemli shólkemlestiriw jumısları ámelge asırıldı. Turnirdiń dáslepki rayon hám qala basqıshları Qaraqalpaqstan Respublikasınıń 17 rayon hám qalasındaǵı 452 máhálleni qamtıp aldı. Bul tómengi basqısh oyınlarında máhálle jaslarınıń ǵalabalıq sport penen shuǵıllanıwı hám óz talantların kórsetiwi ushın barlıq zárúr sharayatlar jaratıldı. Búgingi kúnde mámleketimizde futbol hám basqa da sport túrlerin rawajlandırıw mámleketlik siyasattıń tiykarǵı baǵdarlarınan biri etip belgilengenin atap ótiw kerek. Bul turnir de áyne jas áwladtı watansúyiwshilik ruwxında tárbiyalaw hám salamat áwladtı kamalǵa keltiriw maqsetinde xızmet etedi. Shek taslaw nátiyjelerine bola, qala hám rayon basqıshlarında joqarı nátiyjelerdi qolǵa kirgizgen eń kúshli komandalar endi Qaraqalpaqstan Respublikası basqıshında bas bayraq hám respublika jollaması ushın óz-ara gúres alıp baradı.