Sociallıq tarmaqtaǵı ANTIKORRUPCIYA telegram kanalı arqalı Nókis qalalıq jaslar isleri bólimi baslıǵı Asılbekov Salamat Askarovichke qollanılǵan (hújjet jasırıp qoyılǵan) sógis jazası alıp taslanǵanlıǵı haqqında járiyalanǵan post boyınsha tómendegilerdi málim etemiz:

Nókis qalalıq jaslar isleri bólimi baslıǵı Asılbekov Salamat Askarovichke Nókis qalası hákiminiń 159-13-195-F-25-sanlı buyrıǵına tiykarlanıp, “sógis” intizamıy jazası qollanılǵan. Anıqlanǵan qáte-kemshilikler saplastırılǵan. Kóplegen jańa baslama hám ilajlar ámelge asırılǵanı sebepli, 21-oktyabr – Ózbek tiline mámleketlik til biyligi berilgen sáne múnásibeti menen sógis jazası alıp taslanǵan.

Maǵlıwmat ornında aytıw kerek, Ózbekstan Respublikası Prezidentiniń aymaqlarda joqarı ekonomikalıq ósiw hám xalıqtıń bántligin támiyinlewdiń jańa sistemasın jolǵa qoyıw jáne bul baǵdarda jergilikli hákimliklerdiń roli hám juwapkershiligin arttırıw ilajları haqqındaǵı 2024-jıl 20-dekabr kúngi PP-223-sanlı Pármanına tiykar, ministrlikler hám uyımlardıń rayon (qala) lıq bólimleri basshıların juwapker ministrlikler hám uyımlardıń aymaqlıq basqarmaları menen kelisilgen halda lawazımǵa tayınlaw hám lawazımınan azat etiw, sonday-aq, tiyisli juwapkerlerge xoshametlew yamasa intizamıy juwapkershilikke tartıw ilajların kóriw – rayon (qala) lıq hákimliklerge júklengenligin, hákimshilik wákillikler berilgenligin málim etemiz.

Biz Jaslar shólkeminiń jumısına biypárwa bolmaǵan barlıq ǵalaba xabar quralları, biyǵárez blogerler hám jámiyetshilik wákillerine óz minnetdarshılıǵımızdı bildiremiz.