7-mart kúni Nókis qalasında 8-mart – Xalıqaralıq hayal-qızlar kúni múnásibeti menen saltanatlı ilaj ótkerildi. Onda respublikamızdıń barlıq qala hám rayonlarınan kelgen nuranıy analar, jámiyetlik turmısta belsendilik kórsetip, pidayı miynet etip atırǵan hayal-qızlar, túrli ministrlik hám mákemeler wákilleri qatnastı.

Ilajda Qaraqalpaqstan Respublikası Joqarǵı Keńesiniń Baslıǵı Murat Kamalov qatnasıp, respublikamız hayal-qızların gózzallıq, oyanıw hám jasarıw áyyyamı bolǵan 8-mart – Xalıqaralıq Hayal-qızlar bayramı menen qızǵın qutlıqladı.
Atap ótilgenindey, Húrmetli Prezidentimiz tárepinen elimizde hayal-qızlardı qollap-quwatlawǵa, olardıń bántligin támiyinlewge, jámiyetlik-siyasiy belsendiligin arttırıwǵa ayrıqsha itibar qaratılmaqta. Ásirese, sońǵı jıllarda elimizde gender teńlik máselesi mámleketlik siyasat dárejesine kóterildi. Sonday-aq, «Hayallar dapteri» jolǵa qoyıldı, talantlı qızlarımız ushın hár qıylı sıylıqlar, isbilermen hayal-qızlarımız ushın jeńilletilgen kreditler, qızlarımız ushın joqarı oqıw orınlarında qosımsha kvotalar berilmekte.

Usı orında sonı da ayrıqsha atap ótiwimiz tiyis, usı jıldıń 1-mart kúni Húrmetli Prezidentimiz tárepinen ótkerilgen videoselektor májilisinde, hayal-qızlardı qollap-quwatlaw boyınsha jańa wazıypalar belgilep berildi. Bul wazıypalar álbette, Jańa Ózbekstandı, sonıń ishinde Jańa Qaraqalpaqstandı qurıwda hayal-qızlarımızdıń rolin ele de arttıradı.

8-mart – Xalıqaralıq hayal-qızlar kúni múnásibeti menen Ózbekstan Respublikası Prezidentiniń arnawlı párman hám qararına muwapıq óziniń nátiyjeli miyneti, bay ámeliy tájiriybesi menen elimizde alıp barılıp atırǵan túpkilikli reformalar procesinde belsene qatnasıp, Jańa Ózbekstandı qurıw, xalqımızdıń abadanlıǵın támiyinlew jolında baslama hám ibrat kórsetip kiyatırǵan hayal-qızlarımız orden, medal hám mámleketlik sıylıqlar menen sıylıqlandı.

Saltanatlı ilaj dawamında bayram múnásibeti menen Qaraqalpaqstan Respublikası Joqarǵı Keńesi Prezidiumınıń arnawlı qararı tiykarında túrli tarawlarda jemisli miynet etip kiyatırǵan, shańaraqlardıń tatıwlıǵın támiyinlew, perzentlerimizdi ana Watanǵa muhabbat, milliy hám ulıwmainsanıylıq qádiriyatlarǵa húrmet ruwxında tárbiyalaw jolında pidákerligi ushın bir topar hayal-qızlarımızǵa kókirek belgileri saltanatlı jaǵdayda tapsırıldı.

Sıylıqlanǵanlar atınan sózge shıqqanlar hayal-qızlarǵa qaratılıp atırǵan úlken mehir hám ayrıqsha itibar ushın Húrmetli Prezidentimizge, respublikamız basshısına óz minnetdarshılıǵın bildirdi.

Ilaj kórkem óner sheberleriniń koncert baǵdarlaması menen dawam etti.

Bunday ilajlar respublikamızdıń barlıq qala hám rayonlarında bolıp ótpekte.

Qaraqalpaqstan Respublikası Joqarǵı Keńesiniń Málimleme xızmeti