Kechirasiz, bu matn faqat Qaraqalpaqsha tilida mavjud. Для вашего удобства, содержание ниже показано на доступном языке. Вы можете нажать на ссылку, чтобы изменить язык всего сайта.

Jaslar isleri agentligi Qaraqalpaqstan Respublikası basqarmasınıń baslıǵı P.Maxsetbayev basshılıǵındaǵı jumısshı topar Beruniy rayonına barıp, jaslarǵa baylanıslı mámleketlik siyasat sheńberinde ámelge asırılıp atırǵan jumıslar menen jaqınnan tanıstı.

Dáslep, P.Maxsetbayev rayondaǵı ulıwma bilim beriw mektepleriniń direktorları menen ushırasıw ótkerip, bilimlendiriw mákemeleri hám máhállelerde jaslar menen islesiw nátiyjeliligin arttırıw, olardıń bos waqtın mazmunlı shólkemlestiriw hám jaslar jetekshileriniń jumısın qollap-quwatlaw máselelerin dodaladı. Sonday-aq, «Balalar háreketi» sárdarlar saylawın nátiyjeli shólkemlestiriw boyınsha arnawlı oqıw-seminar da shólkemlestirildi.

Sapar dawamında jaslarǵa jaratılıp atırǵan imkaniyatlar menen sharayatlar orınlarda úyrenildi. Atap aytqanda, Prezidenttiń PQ-1-sanlı qararınıń orınlanıwı sheńberinde «Shabbaz» máhállesi, «Toqimachi» máhállesi hám «Abu Hayat» máhállesinde bolıp, jaslar jetekshileriniń jumısı, olardıń xalıq, ásirese, jaslar menen alıp barıp atırǵan jumısları hár tárepleme úyrenildi. Máhállelerde jaslardıń bántligin támiyinlew, olardı kásip-ónerge baǵdarlaw hám túrli sociallıq joybarlarǵa tartıw boyınsha ámelge asırılıp atırǵan jumıslar dodalandı.

Bunnan keyin jaslar menen ashıqtan-ashıq sóylesiw ótkerildi. Onda Jaslar isleri basqarması baslıǵı P.Maxsetbayevtıń kóshpeli qabıllawı shólkemlestirildi. Sóylesiwde Aloqa bank, Agrobank, Xalıq banki, Ózmilliybank hám Mikrokreditbank wákilleri qatnasıp, jaslar ushın jeńilletilgen kreditler, biznes joybarlardı qollap-quwatlaw hám startap baslamaların qarjılandırıw tártipleri boyınsha tolıq túsinikler berildi. Bul process Prezidenttiń 2025-jıl 14-fevraldaǵı PP-60, PP-61 hám PP-62-sanlı qararlarında belgilengen wazıypalardıń orınlanıwı sheńberinde ámelge asırıldı.

Bunnan tısqarı, rayondaǵı jámlespegen jaslar, belsendi hám intaker jaslar menen ushırasıw da ótkerildi. Ushırasıwda «Ibrat farzandlari,» «Mutolaa,» «Qizlar akademiyasi,» «Uzchess,» «Ustoz AI» hám «YONIDA» sıyaqlı joybarlar hám platformalardıń prezentaciyası bolıp ótti. Jaslardıń jańa joybarlardı jolǵa qoyıw boyınsha usınıs hám baslamaları dodalanıp, olarǵa ámeliy járdem kórsetiw máseleleri belgilep alındı.

Bul sapar dawamında jaslardıń intakerligi, dóretiwshiligi hám olardıń jámiyettegi ornı jáne de bekkemlenip atırǵanı kórindi. Búgingi kúnde Beruniy rayonında jaslarǵa baylanıslı mámleketlik siyasat izbe-iz ámelge asırılmaqta hám 2025-jılı bul baǵdardaǵı jumıslardı jáne de keńeytiw rejelestirilmekte.