Usı jıldıń 20-iyul kúni Nókis qalasındaǵı Jaslar orayı imaratında «Zamanlas» joybarı sheńberinde Sinczyan medicina universitetiniń plastikalıq xirurgiya baǵdarı boyınsha doktorantı Aydos Qutlımuratov penen ushırasıw bolıp ótti.

Ashıqtan-ashıq sáwbetlesiw formasında joqarı shólkemleskenlik penen ótkerilgen ushırasıw paydalı maǵlıwmatlarǵa bay boldı.

Atap aytqanda, Aydos Qutlımuratov óziniń Qıtay Respublikasına qalay barıp qalǵanı, ol jaqqa oqıw ushın barıwda til biliwdiń áhmiyeti, Qıtay xalqınıń milliy úrp-ádetleri hám bilimlendiriw tarawında kózge taslanatuǵın ayırmashılıqlar haqqında maǵlıwmat berdi.

«Házirgi waqıtta doktoranturanıń 1-basqıshın tamamladım, jáne 2 jıllıq oqıwım bar. Oqıwdı juwmaqlaǵannan soń elimizge kelip, medicina tarawınıń rawajlanıwına óz úlesimdi qosıwdı, sonday-aq, janıma shákirtler alıp, úyrengen bilimlerimdi olar menen dee bólisiwdi niyet etip otırman», — deydi ol.

Ilaj sońında Aydos Qutlımuratovqa Qaraqalpaqstan Respublikası Joqarǵı Keńesi hám Jaslar isleri agentligi Qaraqalpaqstan Respublikası basqarması atınan minnetdarshılıq bildirilip, estelik sawǵaları tapsırıldı.

Bekbergen Ádilbaev, reportyor