Ózbekstan Respublikası Prezidenti Shavkat Mirziyoev basshılıǵında 2021-jıl 2-noyabrde ótkerilgen videoselektr jıynalısında qalalar, rayon orayları hám xalıq punktlerinde ekologiyalıq jaǵday hám hawa tazalıǵın jaqsılaw maqsetinde «Jasıl mákan» ulıwmamilliy joybarın ámelge asırıw is-ilajları haqqında berilgen tapsırmalardıń ámelge asıwın támiyinlew sonday-aq, xalıqtıń ásirese, jaslardıń ekologiyalıq mádeniyatın asırıw, qorshaǵan-ortalıqqa dıqqat-itibardı kúsheytiw, ana tábiyatımızdı keleshek-áwlad ushın asırap abaylaw, ekologiyalıq turaqlılıqtı jaqsılaw, maqsetinde qaraqalpaqstanlı jaslar baslaması menen «Jasıl mákan» jaslar akciyası shólkemlestirildi.

Bul joybardı ámelge asırıwdan maqset – xalıq arasında ekologiyalıq mashqalalar sebepli júzege keletuǵın keselliklerdiń aldın alıw, bar bolǵan halatlardıń sheshimin tabıw maqsetinde «Jasıl mákan» ulıwmamilliy joybarı sheńberinde respublikanıń bárshe rayon hám qalaları orayı yamasa oraylarǵa jaqın aymaqlarda, xalıq sanı, ekologiyalıq kórsetkishleri, hawanı pataslawshı islep shıǵarıw kárxanalar barlıǵı sıyaqlı faktorlardan kelip shıqqan halda jer maydanların ajıratıw, sonday-aq, aymaqlardaǵı xalıqtıń dem alıwı, bos waqıtların mazmunlı ótkeriw, sport penen shuǵıllanıwı, mádeniy ilajlar ótkeriw hám jaslar arasında salamat turmıs tárizin keń túrde en jaydırıw ushın xızmet etedi.

Usı jıldıń 16-aprel kúni Nókis qalasındaǵı Jaslar orayı aldında akciyanıń saltanatlı ashılıw máresimi bolıp ótti. Ashılıw máresiminde bárshe ministrlik hám shólkem wákilleri, joqarı oqıw orınları studentleri, akciyaǵa óz úlesin qosıwdı maqset qılǵan kewilli jaslar qatnastı.

Akciya sheńberinde:
Akciyanı Ózbekstan Respublikası Oliy Majlis deputatı L.Seyitova, Jaslar isleri agentligi Qaraqalpaqstan Respublikası basqarması baslıǵı I.Abdikalikov hám Qaraqalpaqstan Respublikası Máhalle hám shańaraqtı qollap-quwatlaw ministri S.Turmanov ashıp berdi hám jaslarǵa iygilikli baslama ushın minnetdarshılıq bildirdi.

“Jasıl mákandı – jaslar óz qolları menen jaratadı! ” uranı astında “Jasıl mákan” akciyasına start berildi hám jaslar, tiyisli mákeme kárxanalardan toplanǵan kewilli toparlar arnawlı avtobuslarda Nókis qalası “Tele oray” MPJ aymaǵında hám «Istiqlol» balalar dem alıw orayı átiraplarında kórgizbeli hám miyweli nállerdi ekti.
Akciyaǵa jámi mıńǵa jaqın joqarı oqıw orınları student jasları, belsendiler hám volontyorlar qatnastı. Olar tárepinen 3 700 dana túp terek nálleri 10 gektar jer maydanına egildi. Akciya tek ǵana nál egiw jumısları menen sheklenbedi, jaslar tárepinen abadanlastırıw jumıları da alıp barılıp qala orayındaǵı maydanlar tazalandı.

Bul sıyaqlı baslamalar hár bir insandı elimiz abadanlıǵı ushın iygilikli islerge úles qosıwǵa úndeydi. Jaslar tárepinen egilgen náller, erteńgi kúni sayamanlı hám miyweli, jemisli tereklerge aylansa, kúnniń shilleli ıssısında kimgedur saya saladı, kimnińdur dástúrxanın toltıradı. Akciyada qatnasqan hár kewilli jas usı maqsette jaqsı niyetler menen nállerdi otırǵızdı.

Akciya Qaraqalpaqstan Respublikasınıń barlıq rayonlarında dawam etedi.