Jaslar menen islesiwdiń jańasha basqarıw mexanizmlerin engiziw, olar menen islesiwdiń vertikal sistemasın jaratıw, jaslardıń mashqalaların tikkeley máhállelerde sheshiw, bilimlendiriw mákemelerinde ruwxıy-aǵartıwshılıq hám tárbiyalıq jumıslardıń nátiyjeliligin jáne de arttırıw maqsetinde Ózbekstan Respublikası Prezidentiniń «Máhállelerde jaslar menen islesiw sistemasın túp-tiykarınan jetilistiriw ilajları haqqında»ǵı qararı qabıl etilgen edi.

Usı qarar talaplarınan kelip shıǵıp respublikamız aymaqlarında bir qatar jumıslar ámelge asırılıp, hár qıylı mádeniy aǵartıwshılıq ilajlar, sport jarısları bolıp ótpekte.

Shımbay rayonındaǵı «Qızılózek» awıl puqaralar jıyınında da máhállellelerde jaslardıń bos waqtın mazmunlı shólkemlestiriw maqsetinde «Jaslar festivalı» bolıp ótti.

Festival sheńberinde Shımbay rayonlıq mádeniyat bólimi xızmetkerleri hám aymaqtaǵı 17-sanlı ulıwma orta bilim beriw mektebiniń talantlı oqıwshıları tárepinen saxnalastırılǵan qızıqlı koncert baǵdarlaması qoyıp berildi.

Sonday-aq, festivalda awıldaǵı bos júrgen jaslar arasında sporttıń voleybol túrinen jarıs shólkemlestirilip, jarıs sońında tóreshiler tárepinen jeńimpaz komandalar anıqlanıp, estelik sawǵaları menen sıylıqlandı.

-Aymaǵımız jasları kórkem óner hám sportqa oǵada qızıǵadı,-deydi usı jıyınnıń jaslar jetekshisi Alım Ótegenov.-Sonlıqtan bizler tez-tezden jaslar menen ushırasıp, voleybol, futbol, stol tennisi, gúres, boks túrlerinen jarıslar ótkerip kiyatırmız. Álbette, bul ótkerilip atırǵan ilajlar jaslarımızdıń keleshektegi turmısına unamlı tásir etedi, dep isenemiz.

Adilbay Orazov,

Qaraqalpaqstan xabar agentligi sholıwshısı