Búgin azannan Nókis qalasında “Bes baslama olimpiadası” jaslar festivalı sheńberinde keń kólemli ilajlar baslandı. Festivalda oqıwshı, student hám jámlespegen jaslar belsene qatnaspaqta.

Dáslep, “Salamatlıq ushın 5000 qádem” joybarı sheńberinde júriw marafonı shólkemlestirildi. “Doslıq” kanalı boyında ótkerilgen bul ilajda mıńnan aslam kewilli jaslar qatnasıp, salamat turmıs tárizin qollap-quwatlawǵa óz úlesin qostı. Marafon qatnasıwshılarǵa jaqsı keypiyat hám ruwxıy kóterińkilik baǵıshladı.

Festival sheńberinde bir qatar intellektuallıq hám mádeniy ilajlar da ótkerildi. Respublikalıq “Jaslar orayı”nda “Munozara” intellektuallıq oyını shólkemlestirilip, jaslardıń bilim hám pikirlew potencialı sınaqtan ótkerildi. Sonday-aq, “Doslıq” amfiteatrı átirapında shaxmat hám shashka jarısları bolıp ótti.

Nókis mámleketlik pedagogikalıq institutında súwretlew óneri boyınsha tańlaw shólkemlestirildi. Bunnan tısqarı, usı institutta “Rektor hám jaslar” ushırasıwı da ótkerilip, onda studentler ózleriniń usınıs hám baslamaların bildirdi. Ushırasıw dawamında bilimlendiriw procesin jetilistiriw hám studentlerdiń bos waqtın nátiyjeli shólkemlestiriw máseleleri dodalandı.

Respublikalıq “Jaslar orayı” Media orayında bolsa “Qızlar hawazı” joybarı sheńberinde belsendi qızlar menen ushırasıw bolıp ótti. Ilajda jaslardıń sociallıq belsendiligin arttırıw, olardıń baslamaların qollap-quwatlaw hám qızlardıń jámiyettegi ornın bekkemlew máseleleri dodalandı.

“Bes baslama olimpiadası” jaslar festivalı sheńberindegi ilajlar dawam etpekte.