Usı jıldıń 8-iyul kúni Nókis qalasındaǵı Jaslar orayı imaratında Qaraqalpaqstan Respublikası Joqarǵı Keńesi Baslıǵınıń orınbasarı Rústem Saparbaev bir qatar belsendi jaslar menen ushırastı.

Ashıqtan-ashıq sáwbetlesiw formasında bolıp ótken ushırasıwda jaslardı isbilermenlikke hám kitapqumarlıqqa qızıqtırıw, olardıń hár qanday túrdegi biznes ideyaların qollap-quwatlaw hám bos waqıtların mazmunlı shólkemlestiriw boyınsha sóz boldı.

Bunnan soń Rústem Saparbaev óziniń turmıslıq tájiriybeleri, jaslıq waqtında basınan ótkergen qıyınshılıqların jaslar menen bólisip, házirgi waqıtta jaratılıp berilip atırǵan keń múmkinshiliklerdi joqarı bahaladı hám olardan únemli paydalanıwǵa shaqırdı.

Ilajda jas dizayner Indira Jumabaeva satıp alınayın dep atırǵan kiyimdi kiyip kórmesten turıp, onıń denemizde qalay turatuǵının kóriwge bolatuǵın interaktiv kóriw aynasın jaratıw ideyası haqqında aytıp ótti.

Bunda qarıydar sensor arqalı ózine unaǵan kiyimdi saylaydı hám ol onıń ústinde payda bolıp qaladı. Aynanıń tómengi bóliminde bolsa siz saylaǵan kiyimge sáykes keletuǵın sumka, shlyapa, remen, ayaq kiyim sıyaqlı aksessuarlar usınıs etiledi. 

Házirgi waqıtta qosımshanıń prototipi jaratılǵan bolıp, eger ol tolıq iske qosılsa, onnan dúnyadaǵı barlıq kiyim-kenshek satıw menen shuǵıllanıwshı dúkanlarda paydalanıw múmkin boladı hám qarıydarlar ushın da anaǵurlım qolaylı boladı.

Sonday-aq, jas agronom Xursand Azilov qıs kúnleri tábiyǵıy gazden paydalanbaǵan halda, yaǵnıy, qaramallardan shıǵıp atırǵan puw arqalı ıssıxana shólkemlestiriw ideyası haqqında maǵlıwmat berdi.

Bul ideyalar Joqarǵı Keńes Baslıǵınıń orınbasarı tárepinen tolıq qollap-quwatlanıp, bunı ámelge asırıwda imkaniyat dárejesinde járdem beriwge tayar ekenligin atap ótti.

Bunnan tısqarı, jaslar tárepinen «Biznes klub» aǵzaları ushın wálayatlarǵa biznes-sayaxat shólkemlestiriw, inglis tilin biletuǵın media-wákillerdi sırt ellerge tájiriybe arttırıw ushın jiberiw, sonday-aq, rayonlarda «Jas liderler klubı»n shólkemlestiriw hám jıl juwmaǵında olar arasında tańlaw ótkeriw usınısı bildirildi.