Usı jıldıń 22-iyun kúni paytaxtımızdaǵı jaslar orayı imaratında «Basshı hám jaslar ushırasıwı» bolıp ótti. Oǵan Qaraqalpaqstan Respublikası Ministrler Keńesiniń Baslıǵı Farxod Еrmanov qatnastı.

Tiykarınan ashıq sáwbetlesiw formasında bolıp ótken ushırasıwda bir qatar jaslar ózleriniń pikir-usınısları menen qatnasıw baxtına miyasar boldı.

Atap aytqanda:

• Ájiniyaz atındaǵı Nókis mámleketlik pedagogikalıq institutınıń studenti Alfiya Amangeldieva Qaraqalpaqstan Respublikasındaǵı qala hám rayon hákimlerin jaslarǵa jolbasshı jáne úlgi etip kórsetiw maqsetinde olar qatnasıwında «Ministrler Keńesi Baslıǵı kubogi» atı menen intellektuallıq oyın shólkemlestiriw;

• «SHABBAZ NUKUS»  jeke-menshik kárxanasınıń direktorı Ádilbek Saparniyazov jas isbilermenler, fermerler, ónermentler qatnasıwında forum shólkemlestiriw;

• Ózbekstan balalar shólkemi Qaraqalpaqstan Respublikası bas sárdarı Gúlbáhár Yusupbekova qala-rayonlardaǵı jámi 252 sárdar qatnasıwında Moynaq rayonında Balalar forumın ótkeriw;

• Ózbekstan mámleketlik dene tárbiyası hám sport universiteti Nókis filialı studenti Azada Satbaeva aldaǵı waqıtlarda qaraqalpaq balalar oyınların rawajlandırıw maqsetinde tańlawlar ótkeriw;

• Tashkent informaciyalıq texnologiyalar universiteti Nókis filialı studenti Biybinaz Tóremuratova IT ǵa qızıǵıwshı jaslar arasında tańlawlar shólkemlestiriw usınısların bildirdi.

Bul usınıslar Keńes Baslıǵı tárepinen qollap-quwatlanıp, aldaǵı waqıtlarda jolǵa qoyıw boyınsha tiyisli tapsırmalar berildi.