Búgin, 7-aprel kúni Prezident Shavkat Mirziyoev basshılıǵında videoselektor jıynalısı bolıp ótpekte. Bul haqqında Prezidenttiń baspasóz xatkeri Sherzod Asadov xabar berdi.

Kún tártibindegi gezektegi másele mámleketlik xızmet kórsetiwdi ápiwayılastırıw hám kólemin keńeytiwdi dodalawǵa baǵıshlandı.

Mámleketlik xızmetler sistemasın sanlastırıw arqalı máhálle hám rayonda qanday ózgerisler bolatuǵını kórip shıǵıldı.

Xalıqqa mámleketlik xızmetlerden paydalanıwda qolaylıq jaratıw maqsetinde 1-iyuldan baslap:

• 38 túrdegi mámleketlik xızmet ushın elektron qol menen tastıyıqlaw talabı biykar etilip, mobil telefon arqalı ámelge asırıladı (jay hám qurılıstıń sırtqı kórinisin ózgertiwdi kelisiw, baqshaǵa qabıllaw hám taǵı basqa);
• 6 túrdegi licenziya alıw ushın talaplar biykar etiledi;
• xalıq hám isbilermenler ushın 8 den artıq mámleketlik xızmet boyınsha elektron xabardar etiw sisteması engiziledi;
• xalıq hám isbilermenlerden kommunallıq shólkemlerdiń 32 túrdegi hújjet hám maǵlıwmatnamların talap etiw biykar etiledi;
• mútájligi bar shańaraqlardıń perzentleri joqarı oqıw orınlarına kiriw test sınaqlarında qatnasıw tóleminen azat etiledi (135 mıń sum).

Bekbergen Adilbaev tayarladı.