Aldın xabar bergenimizdey, usı jıldıń 24-25-26-27-mart kúnleri Qaraqalpaq mámleketlik jas tamashagóyler teatrında Laqqılar Ligasınıń sherek final oyınları bolıp ótpekte.

Keshe, 26-mart kúni máwsim sherek finalınıń 3-oyını óz juwmaǵına jetti. Ilajdı Qaraqalpaqstan Respublikası Ministrler Keńesi Baslıǵınıń orınbasarı Abat Daniyarov ashıp berdi hám ótkerilip atırǵan Laqqılar Ligasın 2022-jıldaǵı «Mega joybar» dep atadı.

Oyında Kegeyli rayonınan «Kegeyli jasları», Nawayı mámleketkik kánshilik institutınıń «Almaz», Shomanay rayonı hákimliginiń «Shomanayshılar» hám Tashkent informaciyalıq texnologiyalar universiteti Nókis filialınıń «Parnas» komandaları úsh shárt boyınsha bellesti.

Tóreshiler quramınıń juwmaǵına bola, tolıq esapta «Shomanayshılar» hám «Parnas» komandalarınıń ulıwmalıq balları qalǵan eki komandaǵa salıstırmalı kóp bolıp, máwsimniń yarım final oyınlarına jollanbanı qolǵa kirgizdi.

Oyınnıń birinshi shártinde saxnaǵa shekem «Жигули» mashinası menen kelgen «Shomanayshılar»dıń bul házili zalǵa jıynalǵan tamashagóyler tárepinen jıllı kútip alındı.

Sonday-aq, 3-shárt – úyge tapsırma shártinde qaraqalpaqtıń bay milliy tariyxın, ullı ata-babalarımızdıń batırlıǵın, sózge sheshenligin hám xalqı ushın janın pida etiwge tayar kelbetin saxna júzinde sáwlelendirgen komandalardıń miyneti ayrıqsha atap ótildi.

«Búgingi oyın oǵada ájayıp túrde bolıp ótti. Komandalarǵa mına jeri mınaday bolıwı kerek edi dep kemshiligin ayta almaytuǵın dárejede», – deydi oyın shólkemlestiriwshisi, bloger Baxtiyar Qadirbergenov.

Maǵlıwmat ushın atap ótiw kerek, búgin Aqmanǵıt jasları, Djentlmen, Jayhun hám Bórshitaw komandaları ózleriniń ushırma sózleri arqalı óz-ara kúsh sınasadı.

Bekbergen Adilbaev, reportyor